狄易達開騷示愛整喊吳亞馨
相隔兩年，狄易達前晚在九展舉行個人第二次演唱會，當晚他落力high爆跳唱，期間更深情向撐場的女友吳亞馨發表愛的宣言！演唱會尾聲達仔一度感觸爆喊，與他拍拖一周年的女友見狀喊埋一份，場面感人！騷後達仔大讚女友一百分，更暗示視女友為結婚對象，不過自嘆經常要女友等他。
狄易達前晚在九展開騷，獲家人及多位圈中好友如蔚雨芯、羅力威及張惠雅等捧場，其台灣女友吳亞馨亦有撐場。當晚達仔又跳又唱，更玩單手倒立、側手翻及凌空轉圈等。達仔亦邀得好友周國賢、前組合EO2及師妹曾詠欣任嘉賓合唱。有份演出的彭懷安（Eddie）事後多謝達仔，因為他的邀請，令久未合體的EO2有機會上台合唱。
怕冇機會表演
期間達仔多次在台上換衫，有歌迷叫他除衫，他笑言希望有日能在紅館除衫。
達仔彈結他唱《Be alright》時，突然用普通話深情表示：「這首歌對我很重要，昨天（大前日）是我們一周年，我們不多機會見面，但很感謝你從來都很堅強面對想念。我就像當兵一樣，一個月沒回來，感謝你對我的支持！」一番愛的宣言簡直令女友冧爆。到尾聲，達仔忍不住爆喊謂：「唔捨得，只係做一場，好怕冇得再唱歌跳舞，怕做完演唱會後就要一直拍劇到天昏地暗，但我會盡力做好每件事。」吳亞馨見狀亦感觸落淚，最後演唱會以《高山低谷》作結。
「不停要佢等」
騷後達仔受訪時指因忙於籌備個唱沒與女友見面一個月，連拍拖一周年都未慶祝，而將於21日27歲生日的達仔，亦因工作未能與女友慶祝，他指女友毫無怨言：「佢付出好大，希望下年年頭可以同佢一齊去旅行。」問會否快點結婚？他暗示視女友為結婚對象，並大讚女友一百分：「最唔好就不停要佢等，我會努力啲，佢叫我呢幾年努力工作，唔好放棄。」
文：音樂組