王宗堯想爆粗寸莊思敏打假波
藝人王宗堯日前在網上與同公司的莊思敏隔空開拖，宗堯昨日就事件首度開腔，懶理老闆蕭定一封口令，狂狙擊對方「打假波」、整容且非專業演員，並以「足球論」勸對方勿太自我。他無懼同場，更自封有禮兼純天然，莊思敏就反指對方違反老闆命令博宣傳，兩人不和再度升級。
王宗堯昨日一臉倦容出席「美亞廚具X安徒生會Santa Cooking Party」，與小朋友炮製聖誕班戟，日前與莊思敏在網上駁火的宗堯有備而來回應事件，雖然老闆蕭定一下封口令，但宗堯無懼激嬲老闆，滔滔不絕有問有答，句句有骨兼以「足球論」狂寸對方，宗堯說：「真係想講粗口，劇組就好似足球隊咁，講Team Work，冇一個球星大過球隊，球星咁自我惟有放棄，好似碧咸咁。」
勸莊思敏熟讀劇本
宗堯否認遭老闆蕭定一「照肺」：「我仲喺劇組，我講嘢係理直氣壯。」對於莊思敏表示與他不是朋友，宗堯輕佻說：「呢啲嘢唔講得出口。（話你斷人衣食？）我睇網民留言，話佢多棲多產，有家底，好難斷。」由於莊思敏表示戲中不是飾演記者，與他沒有對手戲，宗堯暗寸對方不是專業演員：「叫佢返去熟讀劇本先啦，我哋仲有對手戲。我係專業嘅，唔好畀球員自我放大。」問到是否感委屈？宗堯有骨說：「唔委屈，最緊要唔好打假波。」明寸對方曾隆胸，問到擔心拍戲時會面左左？宗堯又寸對方整容：「冇，正常禮貌係要嘅，我係人嚟o架，純天然，有表情做到出嚟。」並承認o靚模女友黎紀君有安慰他。
暗指王宗堯博宣傳
莊思敏則多次表示不作回應：「冇必要講佢。（蕭定一下令封口？）係，由佢講，我對佢嘅嘢冇回應，覺得冇必要單單打打，我唔需要對號入座，除非佢講到好白，總之我尊重老闆嘅意思。（覺得佢咁樣係宣傳﹖）明眼人睇得出。」
文：音樂組