黎耀祥奸到盡秋生撐封帝
黃秋生重返無綫與黎耀祥合作劇集，二人在劇中大鬥演技火花四濺，結果雙雙入圍角逐無綫視帝。比賽第一友誼第二，黃秋生直言應該頒給黎耀祥。而演奸角演到出神入化的黎耀祥亦對四度封帝有期望，又讚黃秋生和陳展鵬係好好的對手。
影帝黃秋生重返無綫，夥拍視帝黎耀祥合作拍攝劇集《梟雄》，劇中二人大鬥演技擦出火花，平分秋色。結果二人雙雙憑《梟》劇入圍「萬千星輝頒獎典禮2015」角逐「最佳男主角」獎項。秋生被問到有否信心奪視帝時，他謙虛表示：「我就希望黎耀祥拎嘅，我唔係因為自己唔想拎而畀佢拎，而係以生意角度嚟睇，個獎對佢利益大啲，佢的確係演得好。」
割愛唔認謙虛
至於為何如此割愛，他直言：「我唔係謙虛唔想拎，如果無綫真係頒呢個獎畀我，我亦都真係多謝嘅。唔好講到我好牙擦咁話唔拎個獎，只可以講我唔係好恨，但又唔係唔稀罕。但大家唔好講到個獎擺咗喺我面前咁先得o架。大家真係要睇咗套劇，覺得我做成點先。」秋生表示每次演出都全力以赴絕無Hea場，因為認真做戲先是他最享受的時候。
斯文戲有局限
貴為三屆「視帝」的黎耀祥實力當然不容忽視，在《梟》中將「龔嘯山」一角演到出神入化，奸到出汁令人印象難忘。黎耀祥直言偏鋒角色才是演技發揮的大好機會：「我好耐無做奸角，奸角可以去到好盡地演，斯文戲發揮則有局限。」問到有否信心四度封帝，他表示：「好難講，好多人都叫我努力啲，但後期控制唔到，但有期望嘅。」對於後起之秀陳展鵬先拔頭籌膺新加坡和馬來西亞視帝，他說：「佢係有資歷嘅演員，係實至名歸，如果佢拎埋『萬千星輝』，觀眾會有新鮮感，佢同秋生都係好好嘅對手。」
化妝：Jolinn Ng
髮型：Jeff Ng
場地：港威酒店
文：影視組