葉家寶嘆職位危險：有冇人肯當？
為亞視服務多年的執行董事葉家寶前晚宣布辭職，昨晨他返抵亞視總台時眼角現淚痕，他直言辭職別無選擇，並相信難以找人接任：「咁危險嘅職位有冇人肯當呢？」不少亞視藝員對家寶辭職表示可惜。
亞視再次拖欠員工薪金，限期前（本月七日）僅向過半員工發放11月糧，執行董事葉家寶前晚更宣布辭職。平日準時八時多返工的他，昨晨十一時許乘車返大埔總台，被大批傳媒追訪。見家寶右眼角現淚痕，他坦言心情尚未平復，又指兩、三個月前已向董事會說明，若公司再拖欠人工或有其他因素，作為執行董事的他也無能為力：「今次辭職我別無選擇，最痛心要暫時離開同事。我同同事打拚咁耐，總算覺得係一個階段堅持後嘅終結，加上見到公司有新方向、新投資者，令公司有新做法，我覺得電視台要一代新人換舊人，希望繼續畀多啲新人機會做唔同崗位。」
轉任高級副總裁
家寶表示未有新計劃，可能讀書或放長假，但不會即時離開公司，會以高級副總裁身份留低協助公司短期內的交接。問到是否有人選繼任執行董事？他笑說：「暫時未有，呢個咁危險嘅職位有冇人肯當呢？」並謂相信此次法庭判決給予一眾公司董事、負責人、執董一個明確訊息，對自己來說也是個「終身教訓」。家寶深信：「人生總有落幕嘅時候，亦總有另一個起點，希望自己人生邁向另一個高峰。」又祝福亞視及一起拚搏的同事，語畢便匆匆上樓。他於下午約一時半與同事乘車離開總台。
袁潔儀收通知出票
亞視藝員袁潔儀昨早十時半現身大埔總台，對於亞視再拖欠員工薪金，她坦言失望，但她已獲藝員科通知已出支票。提到家寶辭職，會否怕亞視「無人駕駛」？她直言早兩日已料到對方辭職，故不感意外，但戥對方搞到「一身蟻」感可惜。問會否怕沒有人敢做執董？她說：「可能老闆心目中有人選擇呢，言之尚早。（冇家寶氣氛唔同？）可能失落少少，呢樣其次，出到糧先穩得人心。」
前亞姐張家瑩對於家寶宣布辭職大表傷感：「睇新聞見家寶眼濕濕，我本身眼淺都喊咗出嚟，相信對佢好大打擊。（影響你去留？）佢話會做高級副總裁，我都會繼續配合。（你自薦做下任執董？）絕對唔會啦！個位咁危險。」至於前亞視藝員韓君婷昨日出席活動時表示，家寶是她入行第一班認識的同事，如有需要樂意幫助對方：「我覺得喺亞視出嚟嘅藝員都好強，佢哋習慣改變，我將呢間公司列為風波公司。」此外，勞工處昨日派員到亞視會見部分員工，表示會繼續監察亞視支付十一月工資的情況，依法處理，不排除檢控任何違例人士。
文：影視組