李克勤生日難得享天倫
李克勤與吳若希（Jinny）齊齊現身撐環保，剛過生日的克勤更Sweet爆話收到家中兩個「老細」的特製蛋糕，坦言今年難得可與家人一齊食飯。身為曼聯球迷的克勤講起早前在節目中收「死對頭」車路士手信，他笑言應該全世界都知自己是「曼聯躉」，但心情靚的他表示玩下無妨。
歌手李克勤與吳若希前晚出席宣傳環保訊息的音樂會，兩人分別在台上高歌幾曲，並宣揚環保訊息，帶動全場氣氛。上星期日（6日）正日生日的克勤接受訪問時表示生日沒有特別慶祝，只是與家人簡單食飯，講到他在微博晒出自家製生日蛋糕，他笑言不知道兩個囝囝可有幫手：「我諗唧下朱古力、擺嘢上去嗰啲都有嘅，同埋都有畫啲得得意嘅嘢畀我，今年好彩有得一齊食飯，之前一兩年生日都要開工。」
收禮嚇老婆
談到身為「曼聯躉」的克勤在無綫節目《Do姐去Shopping》中收到「對家」車路士的人形紙牌做手信，他笑言沒有擺在心上：「收到嗰時就打咗個突，因為全世界都知我係曼聯擁躉，不過冇咩嘅玩下啫，後尾節目出街開始好多朋友打嚟問我，我先知原來喺其他人眼中我唔係收曼聯嘅禮物係咁好笑。」他又搞笑爆該紙牌放在家中嚇親老婆，現已安置在倉中。
曾參加過內地綜藝《蒙面歌手》的克勤，被問到早前許志安參加內地歌唱節目時，唱廣東歌慘被評審崔健狠批「過時」，克勤直言轉個角度想，多人留意亦是好事：「可能講嗰個冇心，聽嗰個冇心，係睇新聞個啲激動啫，但我都相信崔健冇惡意嘅，我參加《蒙面歌手》嗰時都未必句句啱聽，但就係考你EQ同現場反應嘅時候。」
緋聞陸續有
另外，同場的Jinny被問到早前被爆載馮允謙出入，她直認真有其事：「因為佢冇揸車，所以就車埋佢，嗰日係一齊做完《實習天使》宣傳。」講到今次該是Jinny今年最後一單緋聞，她即自爆應該陸續有來，因為早前又被影到她載胡鴻鈞（Hubert）：「我哋係好姊妹，不過啲粉絲鍾意我同Hubert一齊，（佢會介意？）佢又單身，應該冇咩所謂。」
提到網上有個「最討厭十大藝人」選舉，而Jinny排第六位，Jinny對此笑言：「當我知道入選原因係『老是常出現』，我都覺得幾好笑。」問可覺得第一名的G.E.M.是實至名歸？Jinny謂：「本身我唔識佢，冇實際相處過，所以唔方便評論。」
文：音樂組