綠葉王孫季卿 離世低調設靈
無綫綠葉王孫季卿上月30日因病離世，享年83歲，昨晚於紅磡福澤殯儀館設靈，資深演員余子明和李海生等昨晚都有到靈堂致意，余子明離開時謂：「孫季卿遺容好似好安詳，設靈就係以基督教儀式。」又指幾個月前對方才從長居的東莞回港拍劇。談到孫季卿後頸有一腫瘤，他續謂：「我見佢頸度粒瘤就好似大咗，但又冇話痛喎。」
無綫企業傳訊部副總監曾醒明就表示昨晨收到家屬通知，又代表無綫指事件惋惜：「佢係好出色敬業樂業嘅資深演員，亦好提攜後輩，佢遺作係上年嘅《名門暗戰》。」
同樣大感可惜的無綫高層樂易玲就透露孫季卿家屬希望低調處理，望他們節哀順變。
馬浚偉讚敬業
1984年加入無綫的孫季卿，在31年間與無數藝人合作，其中呂珊昨日於活動中大讚對方是電視界的中流砥柱：「佢好有熱誠，準時，會做好本分，對白交足，唔會NG。」至於梁榮忠則謂對方給大家帶來很多美好回憶：「咩崗位都付出100分，真係要更加珍惜啲前輩，無論係主角定係道具，真係要珍惜。」
跟孫季卿合作多次的馬浚偉，亦知道其病逝消息，他表示：「孫季卿就像個慈祥的爺爺，他很敬業，永遠準時，不用拿劇本都清楚所有對白！他83歲離開，只要沒太大痛苦，也是很有福氣，希望他家人能節哀、卿叔能安樂長眠！他一笑就特別燦爛，好慈祥，大家都好尊重佢！」
同樣曾多次與卿叔合作的馬國明對其病逝亦感可惜：「我都好唔開心，呢輩演員買少見少，佢嘅存在可能唔太起眼，但佢嘅演藝修為唔係一般臨時演員可以做到，所以要好好珍惜！（得益？）佢手字寫得好靚，拍古裝時都有代過我寫字！」
文：影視組