香香被鬧懵盛盛學粗口傍身

岑麗香、苑瓊丹、黃光亮、陳煒等在將軍澳電視城為無綫新劇《火線下的江湖大佬》拜神，香香在新劇中飾演喜歡舞獅的斯文OL，她說：「之前學咗幾堂舞獅，個獅頭好重，練習完手臂都好痠軟，相信拍完套劇手瓜會大好多。（叫男友幫你按摩?）拍嘢唔使喇，佢都喺外國，我自己按得喇。（聖誕男友會嚟香港?）未知，我都要開工拍劇，大家都好忙，咁我當然想佢嚟啦。」

有味笑話聽唔明

香香表示今次與鄭則士、苑瓊丹、黃光亮等超級前輩合作很開心學了很多，他們經常爆肚但又能繼續應接，問到她有沒有因他們爆肚而NG？她笑說：「如果聽得明都會NG o架。（粗口、有味笑話都聽唔明？）係o架，所以都想學，萬一畀人鬧都知嘛。」

苑瓊丹唔慣靠自己

苑瓊丹數年後再為無綫拍劇，坦言並不習慣，因在內地拍劇有助手照顧，懶得太耐現在要靠自己，故感不適應，她說：「今次係鄭則士叫我返嚟一齊拍嘢玩吓，大家一路有聯絡，合作冇難度。」苑瓊丹近年忙在大陸拍劇，豈不是沒有時間陪老公？她笑說：「佢冇投訴，有乜好得過老婆唔喺香港。如果有三幾日唔使開工我都會飛返香港，啲錢用晒喺機票度。試過有次返嚟香港四個鐘又飛，但唔係為老公，係為見隻狗。」另外，《東坡家事》星期日播出大結局錄得25點平均收視，至於上星期《愛·回家》及《實習天使》分別有22及24點平均收視，一年一度的《歡樂滿東華》則有20點。

文：影視組