城城要求空間：有喜事定公布
天王郭富城自公開內地模特兒方媛（Moka）是真命女友後，兩人在網上的一舉一動成為全城熱話，Moka被極速起底連累城城慘遭負評連連，昨日城城現身活動未見心情受損，卻封口不談戀事，要求有空間，但強調有喜事定會公布。
城城聯同著名設計師Jimmy Choo昨日出席慈善活動，城城即場分享早前到單親家庭送百家被的情景，情感豐富的城城說時更一度哽咽。前晚剛從內地返港的城城，表示此行為新片試造型，他飾演情報員，除了化老妝又要扮乞丐和裁縫，角色上比較沉重挑戰很大。
希望被尊重
如今城城正沐浴愛河，心情靚爆會否難於投入沉重角色？他笑言：「大家都好關心我，我亦都好關心大家，希望大家都會有個好開心、被尊重同好寬容嘅生活。問我嘅話要講嘅嘢已講晒，喺生活上其實由好多嘢組成，對我嚟講工作最重要，我希望同大家分享我工作，生活上就交番畀我，畀番啲空間我自己，要答就係咁多，唔想答完又再答。（因為網友批評而封口？）唔再答嘞，已經答晒，未來日子裏面畀番空間自己，出席活動亦只談工作不談私人生活。」
一支公返歸
那麼結婚會否公布？城城說：「咁係另外一個階段，如果我有喜事當然一定公布，但現階段都係集中番我工作上面。（網民的留言有冇影響心情？）唔會，唔會。」講到女友Moka的負面報道可替她心痛？他即說：「唔再講啦，唔再講啦！（咁對女友微博發聲明？）我轉發咗啦，我女朋友亦都講咗啦！希望大家關心我時，我都關心大家，亦都希望大家有個開心和諧同寬容嘅生活。」
活動後城城即很深閨，乘坐七人車返回寓所。而前晚城城在經理人小美及助手陪同下由上海返港，架上墨鏡、孭背囊的城城一臉倦容，對記者的提問全程報以微笑，未有作答。
文：音樂組