東網民選展鵬贏繼聰六條街嘉欣港女搶票
《東網民選TV King & Queen》於《東網巨星》Facebook投票反應熱烈，暫時領先的票王票后陳展鵬、張繼聰、鍾嘉欣和胡定欣紛紛四出拉票，力爭「民選視帝視后」寶座。截至昨晚八時，陳展鵬以4581票、以約六倍計力壓屈居第二的張繼聰745票，而張繼聰的瀏覽量則稍勝展鵬，令戰況更加激烈。「視后」方面鍾嘉欣繼續一枝獨秀以3175暫時領先稱后。總投票票數已逾1.7萬，瀏覽總次數逾16萬。
最強娛樂資訊App《東網巨星》舉辦的《東網民選TV King & Queen》啟動以來，已吸引了大批粉絲於《東網巨星》Facebook投票和瀏覽，各人票數和瀏覽量每日有不同變化，令戰況更為白熱化。四大票王票后昨晚亦親身站出來拉票，「視帝」票數暫時領先的陳展鵬表示：「《東網》嘅朋友你哋好，今年我係憑住《張保仔》電視劇而提名最佳男主角，如果大家都鍾意《張保仔》入面十一貝勒呢個角色，有情有義，鐵漢柔情嘅感覺，就投我一票啦，多謝！」而暫屈居第二的張繼聰，同樣落力呼籲：「投民選視帝記得投我一票，我係收規華。如果我當選嘅話，承諾大家會孝順父母！」
定欣力谷「神同步」
「視后」競爭同樣激烈，暫時票數領先的鍾嘉欣表示：「希望你哋會投我一票成為《民選視后》啦。如果我當選嘅話，真係會好開心，就係咁簡單，好多謝你哋咁錫我，我希望繼續做多啲好戲畀大家睇。唔經唔覺已入行11年，拍過好多角色，相信大家都記得，今次喺《華麗轉身》飾演港女，喜劇感好重、節奏感都好豐富。其實乜嘢係我最喜愛嘅女主角或視后呢？就係你最鍾意睇嗰個女演員，如果你鍾意鍾嘉欣、令你哋開心快樂呢，就投我一啦，多謝你哋！」
暫屈居第二的胡定欣，亦不敢怠慢向粉絲拉票：「大家快啲上《東網》投選你心目中嘅視帝視后啦。記得投我一票呀，今次《鬼同你OT》最值得大家投票梗係『神同步』啦，都要投埋田蕊妮，記得呀！」
粉絲瀏覽量反勝
截至昨晚八時最新票數和瀏覽走勢，貴為馬來西亞及新加坡雙料「視帝」的展鵬依然氣勢如虹，票數暫領先獲4581票，瀏覽量有一萬次，若成功奪得東網民選視帝的話，成為大滿貫三料視帝。票數被展鵬大大拋離，得745票暫居第二位的張繼聰，其瀏覽量卻比陳展鵬高，達1.2萬次。「視后」方面，鍾嘉欣依然領先，以3175票登首位，而其瀏覽量最高達7.8萬次。僅次其後的胡定欣票數1529票，瀏覽量約8597次。
展鵬得知票數暫時領先，開心表示：「多謝《東網》讀者同一路支持我嘅粉絲支持。好多粉絲默默支持咗我好耐，呢個數係佢哋一直支持我、投票畀我嘅成績。證明我十幾年拍戲每個角色、努力係無白費。獎項係重要，但背後最重要有佢哋，有佢哋我先有呢個機會。」屈居第二、票數相差展鵬約六倍的張繼聰說：「戥陳展鵬開心，證明佢喺無綫咁耐累積咗好多粉絲，大家係好兄弟。」對於其瀏覽量力壓展鵬，他說：「無話力唔力壓，多謝大家支持。不過我懷疑佢粉絲參與人數好多，順便過嚟睇吓我演出，再投番票畀展鵬。」他表示平常心看待獎項，認為展鵬、黃秋生、黎耀祥和歐陽震華亦是值得拿獎的人。
暫時領先「視后」的鍾嘉欣開心表示：「多謝網民支持，衷心多謝佢哋，努力咁多年得到大家認同，今年有信心，天時地利人和，播放時間有影響，keep住平常心面對，唔會強求獎項，多謝大家鼓勵同支持，會繼續畀心機，希望成為大家心目中最喜愛演員！」
文：影視組