郭穎兒驚訝姊妹變城嫂
方媛（Moka）曾加盟施念慈旗下並與陳靜及郭穎兒（Celia K.）同門，昨日Moka榮升城嫂，上周在港與Moka撐枱腳的Celia K.表示毫不知情：「早幾日有同Moka食飯，但係我哋冇傾私人事。我唔知佢同城城拍拖，亦唔會主動去問，因為係佢私隱，佢係好可愛嘅女仔，有拖拍都好正常。」
而前經理人施念慈則指與Moka的合作關係已結束：「呢個女仔係朋友介紹過嚟簽我，在我旗下時好乖、好斯文，印象好好。之後大家冇合作聯絡，最後見佢係舊年。聽到呢個拍拖消息，祝福佢！」至於身在外地旅行的陳靜，則澄清不是自己介紹Moka加入公司，更不知道Moka戀情，但當然會祝福對方！
