城城認戀方媛寄語Lynn：唔使較高下

現年50歲的城城於2013年與女友熊黛林結束七年情後，去年被踢爆透過社交網Instagram結識18個模特兒，當時藝人許雅婷及內地女模方媛亦在其暗交之列。據傳，始終對內地女模情有獨鍾的城城，與方媛已暗交一年，期間不時密會，上周方媛來港時更獲寵幸入主「城堡」，城城亦會出動戰車接載女友，可見方媛地位超然。

城城前晚約十時四十五分，透過個人微博上載一張車廂中十指緊扣的照片，並寫下「這樣開車要慢一點。」還標籤方媛微博，極之罕有地公告戀情。其經理人小美受訪時亦承認「有開心事」公布，並謂：「拍拖也正常，應該祝福他。」兩小時後，方媛亦轉發城城的微博，並風騷留言「嗯！慢慢開。」即被網民大起底。未知是否因網民討論太過熱烈，她昨日刪走了轉發男友認愛的留言，甚至早前來港出席男友新戲首映活動的留言亦刪走，連微博和微信的名稱也更改。而微信朋友圈的圖片、留言和答謝朋友的祝福都全部不留，變得低調。其實早前城城出席活動時無名指戴上戒指，雖然他否認是婚戒，但卻承認有成家立室的念頭，更不排除閃婚。

夠成熟隨時成家

公開戀情後的城城昨晚出席頒獎禮活動，在十多名工作人員護送下到場。記者送上祝福，他亦風騷回應「多謝晒。」，並親口承認與方媛拍拖。問他為何高調晒愛？他說：「人喺唔同階段、成長會轉變，現階段公開我覺得唔會影響工作。（認定女友？）依家想改變，用呢個方式。（拍拖一年？）冇。（一個月？）一個好短嘅時間。」問到方媛有何吸引之處？他勁冧謂：「將來話你知。（女友好嗲？）私人嘢唔講。（點識？）朋友個朋友，食飯識。（張智霖介紹？）唔係。呢種相處方式好開心，希望獲大家祝福。（結婚？）將來嘅事冇人知，公開對我係適合，夠成熟，結婚係另一階段。」問到早前方媛在香港機場被記者追訪時受驚？城城說：「記者一向熱情，我私人生活一向低調，記者撲出嚟好似打劫咁，男人有責任保護朋友。」至於女友來港六日，二人玩了甚麼？他則笑言：「咁要專訪喎。」

女友稱呼老公仔

對於被指二人年紀相差23年，城城表示：「最重要大家心靈興趣，同女友會發掘共同思想。年紀唔係問題，加上我都唔似啦，衰鬼。（閃婚？）交畀個天，希望慢慢認識對方去發展，公開係坦白同誠實。（會公開拖手？）拍拖都好正常。」問有否了解女友的過去？他似乎不太在意並說：「每個人都有過去，唔能夠數人，大家真誠去發展。」有指方媛稱呼他做「老公仔」，他搞笑回應：「係咩？（叫番佢豬豬？）咁又要做專訪喎。」

提到舊愛熊黛林上載鞋照祝福大家，問城城會否祝福對方？他說：「咁呢個當然。（依家好幸福？）希望所有人幸福。」記者再追問Lynn問題時，城城猶疑了很久才再表示：「我諗到嘞，我有一句一定要同大家講，生活唔係戰場，唔使一較高下。」

文：影視組