阿嬌等收珠寶恨男士獻心

鍾欣潼（阿嬌）昨日聯同衛詩雅與湯怡，齊為英皇珠寶「Byzance de Emperor非凡之魅」珠寶首飾展擔任模特兒。阿嬌演繹一套逾600萬元的綠寶石鑽飾，而衛詩雅和湯怡則各自演繹一套價值逾300萬元的珠寶。問到阿嬌比較喜歡哪一類珠寶？她說：「本身鍾意藍色同綠色，今日呢套好靚、好高貴。（有冇珍藏？）未有，媽咪都冇乜嘢家傳之寶留畀我。（你儲樓？）唔係。」

「有心就有金」

至於可會想收到男士送贈珠寶，阿嬌坦言：「呢啲梗係要啦，珠寶梗係男仔送，可以留畀未來老公送。（追求者送珠寶，追到嘅機會會否大咗？）唔會，主要係睇個人本身。（咁送乜嘢會加分？）送個心，不過送乜嘢珠寶代表咗佢嘅品味，呢樣會係考慮因素。（依家最恨收求婚戒指？）唔係，最緊要係個心，有心就有金。」她又謂會在店內選購珠寶送給即將生日的好拍檔蔡卓妍（阿Sa），因對方也喜歡珠寶，問到是否不限budget，她說：「有budget，太貴我買唔起。」她和阿Sa多年來都有互送禮物，她又試過親手整蛋糕給阿Sa，而今年阿Sa生日她們都要綵排演唱會。

英皇鐘錶珠寶主席楊諾思佩戴了名貴珠寶首飾，與三女平分秋色。

衛詩雅除了投資鑽石，還有意投資寶石。

湯怡講心唔講金

另外，穿上拖尾tube dress的衛詩雅走路時步步為營，她說：「着呢啲裙都有啲驚，我試過發夢畀人踩到條裙尾搞到走光，所以會特別小心。」而曾讀過鑽石鑑證、做過珠寶鑑證師的她投資鑽石多年，賺了不少，不過就後悔自己忍不到手，升咗少少就放，不然會賺得更多，她還打算投資寶石。而湯怡就透露男友洪卓立在兩人拍拖初期已送了一隻鑽戒給她，現在兩人一起多年，都是講心，物質並非太重要。

文：名人組