麥長青背妻 凌辱江美儀
麥長青（麥包）在舞台劇《羅生門》可謂色膽包天！劇情講述飾演強盜的他強姦江美儀，他笑稱事前不用向老婆備案，全因美儀早已被公認是「麥包小三」，加上她與包嫂老友鬼鬼，絕對零尷尬！
公認是好戲之人的麥長青、江美儀與單立文，將參演改編自黑澤明電影的舞台劇《羅生門》。麥包視挑戰舞台劇為二十多年演戲生涯中的一大衝擊：「拍電視劇好多時一個大頭近鏡就表達到，但舞台劇唔同，形態同聲音都要控制，呢啲全部都要學。我做咗幾廿年戲，成日諗仲可以有咩新衝擊呢？其實今次做另一個範疇嘅表演，都係一種學習同衝擊。」
故事值得反思
在舞台劇分飾強盜及樵夫的麥包透露，故事分為羅生門、公堂及樹林三個時空，令觀眾反思人性議題：「我會做一個老實嘅樵夫，為咗養家，最後發現自己都講緊大話。另一個角色係強盜，唔需要理人哋感受，只顧個人享受，唔向世界負任何責任，但為咗生存做啲傷害人嘅嘢？好值得大家深思。」
在舞台劇的記者會上，麥包強姦美儀的劇情成為焦點，他坦言這場戲藝術成分高，主要講述人性陰暗面，尺度不太過火。問事前可有向老婆備案？他說：「又唔係拍三級片，唔使嘅，唔牽涉情慾嘢。太太當然知道劇本有呢場戲，但佢同美儀好熟，成日都話美儀係『小三』，所以大家都冇尷尬。」
《羅生門》演出詳情：
導演：袁立勳
主演：麥長青、江美儀、單立文
公演日期：2016年1月29-31日（共五場）
公演地點：北角新光戲院大劇場
文：音樂組