許亦妮梁麗瑩 冤家變閨蜜
同屬港姐出身的許亦妮與梁麗瑩，2012年因合拍無綫劇《師父．明白了》認識，初時互看不順眼的兩人因練劍而混熟，三年間感情昇華至friend過打band，私下感情事、生活煩惱無所不談。她們又互爆追求者與前度的瘋狂事，被指反應遲鈍兼死蠢的許亦妮，幸有梁麗瑩做「醜人」隔絕狂蜂浪蝶。兩女一個是外貌協會，一個追求敦厚穩重，故強調不會發生「爭仔」事件。
被鬧死蠢唔會嬲
許：開頭一齊拍劇《師父．明白了》，啲捕快全部男仔，得我哋兩個女仔，初時同你唔Friend，第一眼覺得你好煩、好多嘢講，一開始都冇諗到會同你做到咁交心嘅朋友。
梁：我係雙面人，外人覺得我好斯文、文靜，但撻着咗就好煩。相反，我覺得你寸寸哋、好冷淡，又未去到乞人憎嘅，但對你冇乜好感，覺得呢類人唔會啱嘴形。
記得第一日唔想同你食飯，又冇理由埋男仔堆，好奇怪咁，跟住你問我食唔食飯，我話好眼瞓，你就話你都係，然後我哋買飯盒一齊食，獨對無言，之後背對背瞓覺。
拎香檳探病
許：嗰陣我哋一齊練劍先熟落，開始你同我講你嘅嘢，我又同你講我嘅嘢，我個人好講信任，後來覺得你值得信任就開始有份感情，但你成日話我死蠢，一個電話好多句「死蠢」、「多餘」！
梁：因為我真心覺得你蠢！正常人諗到嘅嘢，你諗唔到，好似規劃路程咁，你兜個大圈先做到，都算係個路癡。點解你個人可以咁弱智？
許：我都冇嬲過你，因為我真係弱智，哈哈。加上你有種安全感，可能你年紀大過我少少，人生同圈中經歷多過我，好多嘢可以畀好多意見我，問親你都會幫我解決到。生活各方面嘅唔開心，你都同我經歷好多，呢幾年有啲負面新聞，通常第一時間都打畀你。
梁：有時都會覺得你煩，一條問題問十幾廿次，好忟，啱啱答咗你又問，同你傾親電話都成兩、三個鐘。有次我唔舒服又肚屙，本來要食清淡嘅嘢，你夾硬話要嚟我屋企探病，我求你唔好嚟、畀我休息，點知你拎埋香檳、朱古力嚟，仲捉住我傾到三點幾，結果我頂唔順話眼瞓趕你走。
幫老友掃走「煩」音
梁：我份人眉精眼企，有時feel到啲男仔對你有意思，但你feel唔到，當人兄弟，又話人哋冇同你講，我叫你等多幾個月，點知兩個月後你先sense到，打嚟話對方開始飛甩啲friend、淨係約你食飯，你真係好遲鈍。
許：我知你實幫我！我唔騷一個人，佢搵friend幫都冇用！
梁：試過有個男仔追你，你唔睬佢，話佢多嘢講又煩，佢上微博私訊我，叫我以後好好照顧你，我點解要幫佢照顧你？佢見過你一次就好似着魔咁，你哋又唔係拍拖，喺度講咁遠大嘅嘢，我話咁樣會嚇親人！
許：佢又冇同我講喎，好奇怪，我諗佢以為你會將所有嘢講番畀我聽，又想我啲好朋友覺得佢好好，然後慫恿我同佢一齊，但其實相反囉，你會幫我隔絕晒呢啲人。
梁：我成日幫你做醜人，可能個男仔都唔鍾意我，因為我問佢好多嘢，有次問佢點解成日咁得閒，打成千字「詩篇」send嚟，又問佢好尖銳嘅問題，佢話自己開時裝賣衫、工作好自由。
許：記得你以前拍拖，你男友都攞我做中間人同我講好多嘢，諗住我會同你講佢好好，但我有時會鬧番佢。試過你哋鬧交，佢打畀我問有冇見過你，我答佢「冇喎」，佢居然去我屋企樓下，問看更有冇見過我哋，仲要畀貼士個看更！我都會幫手調停，但試過畀佢鬧我加鹽加醋，我梗係幫朋友啦！
男友互相過目
梁：我都成日幫你過目，好多時啱啱結識，我feel到男仔有少少嘢，就會同你講覺得對方點。
許：好多時我唔信，有時覺得普通朋友食飯啫，但我係好需要安全感嘅人，唔好話男女關係，連朋友我都會帶畀你睇，問你可唔可以繼續交心做朋友。有時你好偏激，因為你好保護我，於是好多嘢都話唔好，但過後發現你都係啱嘅，有時都會後悔冇聽你講。
梁：不過我發現，你細個鍾意嗰類型，係我依家鍾意嗰類型，我細個鍾意嗰類型，係你依家鍾意嗰類型，我哋時空交錯咁，你畀初戀男友張相我睇，個樣勁似我依家男友。
擇偶大不同
許：唔係喎，我冇變過，都係鍾意成熟、穩重嘅男仔，我鍾意年紀大過我，外形敦厚、保護到我又教到我嘢，唔鍾意靚仔，我唔係外貌協會，所以應該唔會同你鍾意同一個男仔。
梁：就算撞咗，你要咪畀你囉，但如果我鍾意咗、已經係我嘅，我就唔會畀你囉。我好鍾意李敏鎬，嗰次買咗一張1680蚊嘅演唱會飛，叫你陪我去睇，你直頭好似受罪、好唔熱衷咁。
許：我覺得李敏鎬好靚仔，但唔係我鍾意嗰類型，我鍾意單眼皮，看似好多人生經歷咁，譬如周杰倫嗰啲樣。
蒲MK影貼紙相
許亦妮和梁麗瑩兩位八十後，行為談吐依然Keep住少女味，轉眼相識已三年多，平日無話不談似「拖友」，每逢周六更是固定「飯腳」，許亦妮笑謂：「我哋冇乜興趣，來來去去都係行街買衫，又會兩個人去旺角影貼紙相、唱K，做好少女嘅嘢。」兩女又表示性格相似，梁麗瑩笑稱雙方都好波動，有少許「情緒問題」，一時超級hyper講唔停，一時「冷戰」各自撳電話：「我哋唔出聲，人哋仲以為我哋嗌交，但其實冇嘢，我覺得好友係要遷就，佢好似好明白我咁。」
文：黎寶倫 攝：黎志輝
場地：T'S KITCHEN
許：許亦妮 梁：梁麗瑩