王浩信舉牌示愛累YoYo甩舞

藝人王浩信偕太太陳自瑤（YoYo）昨日到鑽石山為無綫節目《萬千星輝賀台慶》的表演項目預演，一身「印度西施」舞衣示人的YoYo在台上表演時，老公突然舉起YoYo的名牌猛烈搖晃吶喊助威，高調Sweet晒冧功搶盡風頭，卻令YoYo表演時稍為分神。

似睇個女表演

面對自認浪漫的老公，YoYo承認因而緊張，但主要甩舞原因是未習慣以印度服裝跳舞，王浩信則激讚太太跳得好：「好似睇我個女表演咁，之前見個女喺學校表演都好緊張，一路舉牌一路緊張，OK喎我覺得，叻叻豬！」他還踢爆太太密密練，連食飯都要跳！提到兩人早前到馬場慶祝結婚四周年，YoYo讚老公安排特別及非常難忘，問到可會再追多個時，兩人即互相拋波，王浩信說：「我哋都唔會拒絕，講真依家香港要養多個小朋友唔容易。」

王浩信舉牌撐老婆咁鬼Sweet，搞到YoYo唔專心甩舞。

翟威廉漏口風指朝朝會睇到陳庭欣的「馬甲線」！

年紀大爆不舉

同場的緋聞情侶翟威廉與陳庭欣則愛得低調，問到陳庭欣練「馬甲線」的進度，翟威廉卻幫倒忙說：「如果想睇，要朝頭早六點鐘先睇到。（你成日六點鐘睇到？）冇呀！傳聞嚟嘅啫！我哋開廠成日開到六點幾。」身旁的Toby一臉尷尬，連番吩咐對方說話要小心。提到王浩信舉牌撐愛妻，翟威廉再語出驚人：「我呢啲年紀仲舉咩牌，都咁大年紀喇！（咁快不舉？）咦？大家好似叫我嚟係利用我咁嘅？」兩人只好再尷尬大笑。

文：影視組