邵仲衡撩床戰黃心美嗌走
「處女」拍劇的黃心美夥邵仲衡扮情侶，對方竟出口術要求加床上戲，卻被她踢爆兼嫌棄：「有？咁我走先！」搞到邵仲衡還以顏色，大爆心美內裏Open：「係烈女嚟，烘烘聲！」
ViuTV劇集《瑪嘉烈與大衛》主要演員邵仲衡、黃心美、朱鑑然與岑樂怡等昨日到九龍灣影樓，為劇集拍攝海報。雖然見一對劇中情人邵仲衡與心美搭晒膊頭態度親暱，惟兩人實際是鬥嘴冤家，訪問時互玩踢爆！
問到劇中可有親熱戲時，邵仲衡即時自爆與心美共演床上情慾戲，但在旁的心美聽畢即時澄清，還將身旁的監製金廣誠擺上枱，力證邵仲衡所言並非屬實：「金生話我聽係邵仲衡做嘅時候，問佢有冇Kiss，金生都話冇！有？咁我走先！」
反擊：佢內裏Open
雖然邵仲衡未再出口要求，但為奪取心美的螢幕初吻，仍然堅持己見，還賣萌嘟嘴向心美獻吻，可惜換來的仍是心美的一再婉拒，最後他只好反面還擊：「你唔好扮正經，你係咩人我好清楚。（心美係咩人？）即係表面斯文，內裏就Open囉！係烈女嚟，烘烘聲！」他又自爆經驗豐富，落力游說加咀戲。
「好耐冇畀男人掂」
對於首次拍劇能與「蟹哥」邵仲衡合作，心美大感開心，笑言首次見面即被熊抱：「同佢影相嗰時一嘢喺後面攬埋嚟，嚇死我！跟住我咪面紅耳赤！我好耐冇畀男人掂過！」心美開拍前做足準備，直認事先上堂進修演技！
文：影視組