唐詩詠冇呷醋 勸洪永城氹翠如
近年經常於劇集被強姦的唐詩詠於新劇又「重操故業」，不過對象湯鎮業卻是新手一名，昨日詩詠出席宣傳活動時，自爆對「被姦」有經驗，叫前輩毋須尷尬。而對於緋聞男友洪永城揚言就「四角戀」一事擺和頭酒，詩詠自言沒有食過，認為永城應先與黃翠如吃生日飯兼和頭酒。
藝人唐詩詠、黎耀祥、馬國明、陳煒等昨日齊為新劇《梟雄》宣傳，席間一眾演員鬥擺甫士給現場觀眾投票，詩詠為吸票竟擺自己於劇中被強姦的戲份上枱：「我每集都畀人強姦，希望大家畀like我，拍呢啲戲好辛苦！」惟最終卻被馬國明勝出。
繼《鐵馬尋橋》及《神探高倫布》後，詩詠於《梟》劇又被湯鎮業強姦，她笑謂：「我佔10集戲，集集都有危險。其實湯鎮業係第一次拍呢啲戲，嗰日講佢飲酒，咁佢真係有飲，我同佢講我呢方面有經驗，知道晒個流程，叫佢唔使尷尬，好在最後都一take過。」
未擺和頭酒
談到緋聞男友洪永城早前揚言要就「潮文」引起的四角戀與她擺和頭酒，詩詠笑謂：「我唔飲酒，亦冇食過，佢最緊要同黃翠如食，又係生日飯又係和頭酒，再唔食真係嬲佢。（佢兩個食？）冇所謂，如果叫埋我冇所謂，大家知道佢哋好朋友。（翠如真係嬲？）我叫佢唔好嬲，好小事。（有冇叫洪永城以後慎言？）佢不嬲都係咁，唔講嘢會死。（有冇少少呷醋？）點解？佢個樣咁普通，同任何人都好襯，幾啱拍劇。」問到兩人是否公開關係？詩詠表示不知對方所想，坦言洪永城經常亂說話，故不用理會。
陳煒無假放
而陳煒對於被網友大讚演技，又指她有已故歌后梅艷芳風格，陳煒表示戲中的20年代造型，再加上穿旗袍甚有女人味，故才令人聯想到有對方影子，更指稍後將開拍新劇，預料短期內沒有假放，問到可有時間與老公見面？她謂：「佢過嚟啦！我返唔到台灣。」至於黎耀祥則表示新劇角色與多年前的「柴九」角色不同，但不介意觀眾作比較。文：影視組