秋生嚴師選高徒為陳凱琳不值

影帝黃秋生早於1994年憑《八仙飯店之人肉叉燒包》及1999年憑《野獸刑警》兩度獲封香港電影金像獎「最佳男主角」。幕前他形象敢言硬朗，但對於家事卻甚少主動提及。今次秋生接受本報訪問，細談在家中扮演的角色，及鮮為人知的一面。

家庭篇：激嬲老婆半年冇睬

「大家都會有好奇、八卦心態，但我覺得家事無必要主動拎出嚟講。我係演員，係賣作品，如果賣花邊即係話自己作品唔得啦。如果花心思喺啲旁門左道上，正路嗰個人都做唔到咩嘢。有時傳媒影到我同女仔同行，都會加鹽加醋。（點面對太太？）有乜點面對啫，梗係大件事啦，梗係會嗌交啦，必然o架啦。惟有處之泰然囉，打你就企定，我都唔知幾烏龜。（怕老婆？）梗係怕啦。唉，最嚴重試過唔睬你囉。（半日？）半年呀。（點氹番太太？）冇㗎，臉懵懵咁囉。其實佢好溫柔又賢淑，唔係我口講咁o架。」

秋生少有提及太太，自爆曾令對方嬲足半年。	秋生的長子現長居美國。	曾嘗低潮期的秋生，不但未有投訴和怨恨，反以正面態度增值自已。

慈父篇：畀足選擇任兒學飛

「我從來唔打小朋友，只係佢哋細嗰時會惡吓，嚇吓佢哋，但呢個唔係好方法。我唔會好提供物質畀佢哋，佢哋有嘢想買，會叫佢自己儲錢買。（對兒子的期望？）無乜o架，希望佢哋開開心心做人就夠，做父親冇得期望。佢哋成長過程中作為家長應該要畀佢哋嘅都畀咗，識彈琴又識拉小提琴，長大咗佢哋鍾意第二樣，咪由佢哋行自己路囉。佢哋要去選擇自己嘅生命，呢啲冇得逼，逼佢反而唔開心。依家大仔在美國、細仔在加拿大，兩個都好獨立。我梗係掛住佢哋啦，大嗰個每晚都會視像通話，細嗰個就讀書讀唔停冇時間。小朋友要成長，成長就要飛，唔係留喺父母身邊做裙腳仔做咩呀？」

秋生直言有興趣做導演，但一切睇機緣。	秋生大讚陳凱琳及蔡思貝各有特質，只係仍需磨練。	秋生坦言黎耀祥是好對手，合作拍劇充滿火花。

事業篇：機緣飄渺學識忍隱

「呢輪我都成日諗，我哋呢個年代差不多過去o架嘞，再行落去會變成老師、前輩身份。如果要喺呢個時候突破，咁就要做一個浴火鳳凰，一定要將自己全面改變，才令人眼前一亮。但要明白，咁嘅年紀唔可以話突然有機會爆紅、好受歡迎，只可以喺自己軌道上再加分。好多人問我會唔會做導演？我係好有興趣，但要講機緣，要得人信任先有機會。有人問我從影以來，有冇作品覺得是滄海遺珠？我會答《終極一戰》。我覺得自己演得好好，亦放咗好多心機落去，但無論迴響、票房、獎都係冇。（灰心？）做呢行一定有低潮，我依家都係一個學習過程，一定要學識『忍隱』，要同自己講『秋收冬藏、春天發芽』要學識增長自已，唔係投訴和怨恨，用呢段時間思考吓，可能係上天畀時間你去休養再出發。」

青黃不接：有特質少磨練機會

「娛樂圈藝人青黃不接有好多原因，其中一個係少機會。以前好多劇和戲開拍，機會好多。依家好多演員都缺乏個性，呢方面好重要，唔係話似邊個邊個就得。近期我有留意到蔡思貝，一望上去就覺得佢有特質，我唔係話佢做得好，係有待磨練嘅，但睇到佢有quailty。陳凱琳都有特質，只不過係導演冇幫佢。佢對眼好靚，但用得太多就唔好，如果我係導演就會叫佢收吓，偶然用一次就好，但佢用得太多。佢係一個咁新嘅演員唔識，導演有責任同佢講，淨係望住人哋對眼話好靚好靚唔得嘅，有時啲優點會變成缺點。」

嘆韋家雄不被重用

「如果蔡思貝和陳凱琳合作，我建議佢哋可以拍《倚天屠龍記》，陳凱琳演周芷若、蔡思貝演趙敏。（你呢？）我只可以做金毛獅王，但邊個可以做張無忌呢？（鄭嘉穎？）佢40歲啦嘛，咁會令個演員好尷尬。其實男演員都青黃不接，韋家雄真係要重用，戲又得人又醒，呢個演員真係掂，有台柱嘅實力，點解唔重用？呢啲咪浪費囉，成日嗌冇人冇人，但有人又唔善用。」

杏兒祥仔絕佳對手

「早排同黎耀祥、胡杏兒合作拍無綫劇《梟雄》，同黎耀祥合作固然係好事，一部作品有好『腳』好重要，因為戲唔係一個人做。對手要強先有得拳來腳往，唔通畀兩個沙包、紙紮公仔你打，會好睇咩？好多人都有錯嘅概念，戲唔係一個人演，一對球隊要有強勁對手，場波先會好睇。」

「胡杏兒在劇中固然做得好，演技純熟。我好鍾意睇佢個樣，以前唔識佢睇佢演出，已經覺得佢個樣好可愛，好靚女。尤其鍾意佢啲假哨牙，好可愛，可惜今次同佢冇咩感情戲，我哋關係發乎情止乎禮。係啱嘅，夾硬來會好肉酸。」

後記：神級影帝 敬業樂業

影帝黃秋生為訪問做足準備，記者到場前他已將當日要穿的多套衣服，井井有條地掛在酒店房間內。當日他需要連續接受多間媒體訪問，還向記者分享當年為電影《頭文字D》到日本接受多個媒體的專訪，由早上九點直踩到晚上七時，時間雖長但相當享受過程。他自言喜歡電影，工作過程不覺辛苦，反而是種享受。影帝果然敬業樂業，讚！

文：影視組

化妝：Jolinn Ng

髮型：Jeff Ng

場地：港威酒店