陳凱琳組織「嘉」庭歎慢板
無綫一班女藝人陳凱琳（Grace）、岑麗香及高海寧等昨日以Tube Top背心配牛仔短褲為《萬千星輝賀台慶》造勢，Grace再獲委以重任擔任當晚的司儀，前途無限，難怪無意效法師姐胡杏兒，拍拖一年左右就決定結婚。
陳凱琳、岑麗香與高海寧（高Ling）等昨日到將軍澳宣傳19日舉行的《萬千星輝賀台慶》，一班女星還即場預演當晚表演項目「大姐花旦歌舞團」。人氣最盛的Grace表演跳舞時卻企後排，她解釋：「跳舞唔係我強項，但會努力練。（無綫睇重畀你再做台慶司儀？）多謝公司畀機會。」提到胡杏兒宣布下月結婚，問她與男友鄭嘉穎會否效法？Grace表示唔急嫁：「個個人唔同，我祝福杏兒，佢喺最啱嘅時間遇到最啱嘅人，係好開心嘅！但我暫時仲想拍多啲劇。（嘉穎到咗適婚年齡？）歲數冇乜所謂，好多人20歲就結婚，所以唔係問題。」
香香談婚一步步嚟
至於岑麗香透露已獲男友提前為她慶生：「我11月17號生日，到時應該要排舞。（男友為你慶祝？）之前佢已經畀咗Surprise Party我，仲有花！（好冧？）都開心嘅，禮物就要17號先知。（好似杏兒咁慶生兼公布婚事？）要一步步嚟，仲需要多少少時間。」而高Ling在台上自言全身最瘦係腰，卻被張繼聰取笑：「我唔信你條腰瘦得過你大髀！」她反擊說：「我係講個Shape！（最滿意條腰？）唔係，可以再瘦啲，雖然未知台慶係咪着呢套衫，但我會再減。」
讚陳展鵬抵贏視帝
另外，Grace昨晨出席抗癌活動，提到嘉穎憑《天眼》與張繼聰及陳展鵬角逐《TVB馬來西亞星光薈萃頒獎禮2015》爭「視帝」，她說：「知道佢（嘉穎）好努力，做戲非常叻，佢話有係獎賞，冇都開心入圍。（前緋聞男友展鵬都入圍？）三個做戲都好好，都有資格做視帝，冇話想邊個贏，三個值得贏！」
文：影視組