仙樂都性感遭白眼壓力爆煲
性感女星仙樂都（吳堯堯）自資出歌闖入樂壇，可是因周轉不靈，一度陷入財政危機。加上新歌令她憶起被非禮的慘痛經歷，兼被網民鬧爆「醜女」，搞到壓力爆煲。最終她決定拋開束縛，舉行下水禮游泳減壓！
仙樂都最近由寫真界踩入樂壇，自資五位數推出新歌《新出發》，由於資金有限，令她要四出頻撲(R)贊助：「原本有朋友應承贊助，但最後縮咗沙，當時搞到我幾徬徨，好彩最後有朋友仗義幫手，但因為要使好多錢，覺得壓力好大。」另一壓力源自於在新歌派台時，因形象性感而遭受別人白眼，她說：「問過其他人意見，佢哋話派台方面都有啲難搞，因為人哋對我形象唔係咁好。真係會唔開心，自己冇做錯嘢，點解人哋要咁睇自己。」
唔介意籍籍無名
仙樂都的新歌《新》正正是講述入行以來經歷過的高山低谷，更令她想起了疑被龍心胸襲的慘況：「我一直唔介意自己係個籍籍無名嘅模特兒仔，之後因為一個錯摸，畀人非禮而一夜成名，明明當時我係受害者，唔明啲網民點解會鬧我醜樣，我靚唔靚關你哋咩事？」不過最令她傷透心的是有口痕網民指她「博畀人摸」，一臉委屈的仙樂都說：「其實係個節目要求我咁着，通告叫我着吊帶背心、熱褲，好多人話我要多謝佢添。」
游水減壓兼修身
「錢」路茫茫，加上憶起不堪回首的往事，近日壓力爆煲的仙樂都索性游水減壓，她說：「游水減壓，當練埋氣咁，又可以順便修身，聽人講游水會令身形變得好睇啲。」
文：音樂組