湯鎮業首戰影視帝鬥戲冇難度
湯鎮業事隔多年再返無綫及接拍台慶劇，於劇中與視帝黎耀祥及影帝黃秋生互相「鬥戲」的他直言演出零難度：「做番自己已經好好睇！」談到其一對孖仔不時被招攬入行？霸氣爸爸湯鎮業稱不介意兒女入行：「但讀埋書先！」
近年少於本地電視圈露面的湯鎮業（Kent）闊別無綫三十年後接拍今年台慶劇集《梟雄》，他坦言全因監製王心慰（Amy）的多番邀請及黎耀祥與黃秋生等強勁卡士才促成美事：「Amy好有誠意打幾次嚟，我推推吓唔好意思，陰差陽錯就返嚟。而且第一次同秋生同祥仔合作，我睇祥仔電視演出就睇得多，所以合作有新鮮感。」
以柔制剛
談到Kent於劇中與視帝及影帝對戲角力，他笑言鬥戲毫無難度：「唔需要誇張去做，反而做番自己已經好好睇！我哋有底蘊同經驗，做起嚟冇咩難度。」問到多數演出頭目角色的Kent會否出現搶戲情況？他即大讚人物角色飽滿，故能輪流發揮：「人物多通常戲唔多，但今次每個人物都有戲！（搶戲？）我哋三個大亨出嚟就冇話邊個搶邊個，反而以柔制剛同有張力就好睇。」
撐仔入行
問到Kent的仔女有否化身粉絲追看劇集？他笑言仔女小時候根本不知自己是影星：「我攞以前後生啲相畀對7歲孖女甜甜同圓圓睇，佢哋都認唔到係我，後來佢哋知道，就喺同學之間話自己爸爸做皇帝，好自豪！」提到盡得其真傳的另一對孖仔湯君慈及湯君耀不時被指遭發掘入行？Kent坦言不介意他們入行，但要先完成學業：「咪當Part time搵外快去增加自信同人脈。（日後提攜囝囝？）佢哋有入行嘅條件，但讀埋書先！」
文：影視組