男人幫舞鬥家強誓伸拍檔落台

梁漢文（Edmond）及蘇永康繼與老友許志安、張衞健組成BIG4獲得空前成功後，今年再搞新意思與同公司的任賢齊（小齊）及黃家強另起爐灶，組成音樂性比BIG4更高的「男人幫」。四個大男人除率先於十月底在台灣舉行熱身騷試水溫，更會在11月27至29日假紅館舉行一連三場的《男人幫演唱會2015》，為未來的巡迴演唱會拉起序幕。

備戰巡迴騷

對於今次的合作，四人直言相逢恨晚，在各方面每個崗位大家都合作無間，Edmond說：「雖然各自發展好耐，但我哋四個把聲擺埋一齊都好融和到，真係夾都冇咁啱！」講到今次將會走巡迴騷，身為老闆的小齊話早已有兩手準備：「我哋有兩套方案，一套係廣東星馬地區，一套就國語為主，佢哋好多歌都有國語版，家強廣東歌直頭唔使煩，唔識廣東話都識唱，音樂冇咩語言障礙。」

自誇有節奏

而演唱會其中一個「必睇位」就是Beyond出身的家強，將會被迫轉型做跳唱歌手，問到家強可已準備接受挑戰？他自信地說舞功比另外三人厲害，正當三人為自己抱不平時，家強笑謂：「個人有節奏感就咩舞都識跳o架啦，總之你哋唔好畀我伸落台就得喇，跳嗰時行開少少唔好咁埋！」

小齊又提議Edmond唱《情人》時，家強可以在旁邊跳舞，聽到一額汗的Edmond即高呼：「嘩！你當我光管啊？不過啲人鍾意新鮮感，呢個諗法係啱o架，我決定唱《情人》就扮柱，佢就可以當柱係情人去發揮個感覺。」雖然大家講到興高采烈，但小齊和蘇永康直言每個部分都要適當配合流程：「盡量跟音樂編排去排舞，如果深情又激烈就好怪。」

文：音樂組　

攝：林蔚恩

髮型：Matthew Kong@headquarters（黃家強）、Moe@fifth（蘇永康）、Moe@fifth（梁漢文）

化妝：Maggie Lee（黃家強、蘇永康）、Kei Kei Ng（梁漢文）、A Yip（任賢齊）　

場地：千禧新世界香港酒店