金剛賺快錢踩界賣大閘蟹

金剛近日忙於拍攝劇集及旅遊、飲食節目,適逢大閘蟹當造季節,他與友人齊齊搞大閘蟹生意,日前更親自落舖點貨及幫街坊揀蟹,有心做的他一手一腳,親力親為。

無綫藝人金剛忙於為節目及劇集拍攝外,近日更忙於搞大閘蟹生意,除與拍檔之一喬寶寶齊齊做生招牌外,更不時親力親為幫好友訂貨兼送埋貨,全心全意做這份副業。日前,金剛落到其中一間元朗舖頭巡舖,期間更幫客人揀蟹,向來講廣東話不是太多人聽得明的他,不時叫「買鞋(蟹)呀!買鞋呀!」引來不少街坊前來買蟹,當然金剛都好識做,男女老幼邀合照都未托手曆(月爭)。

身兼多職

金剛坦言向來於台灣與友人夾分做時裝生意,今次做大閘蟹批發生意,當是學多一樣東西:「其實係一個機緣嚟!之前有報道話我冇工開,又話我賭波輸錢,要搬屋幫人送蟹,真係好好笑兼無厘頭,乜都作得一餐,我都不知幾忙,咁啱有朋友搵我一齊做呢個生意,我諗不如學多樣嘢啦!講真自己第一次做呢類生意,好多嘢唔識,正所謂萬事起頭難,但估唔到自己好享受呢個過程,平時返公司開會,傾選貨、同其他老闆開會,都學到好多,係一個經驗,慢慢學習。」

拒棄幕前

問金剛會否做上癮轉型不做幕前?他謂:「咁又唔會,呢個係副業,演藝事業唔會斷,始終都做咗咁耐,依家有拍劇、有做飲食節目、旅遊節目,都希望之後公司畀多啲唔同機會。」

提到之前有指他賭波輸百萬要搬屋,金剛笑言:「之前搬屋,係因為我不嬲都想住啲新啲,又可以約啲朋友返屋企BBQ嘅地方,只有村屋先可以咁,咪搬囉!我都唔明點解會傳我賭波,賭呢啲嘢我由細到大都唔多玩,波我亦都唔多識,真係好無聊。」

文:影視組