周潤發城城硬闖阻溫拿解散

陪伴無數香港人成長，極具代表性的溫拿樂隊，自早前傳出解散消息，五位成員譚詠麟（阿倫）、鍾鎮濤（阿B）、彭健新（健仔）、陳友和葉智強日前受訪時亦坦承有成員曾提出解散。到前日凌晨時分阿倫在其facebook專頁上分享溫拿分別與周潤發和郭富城的合照，並留言稱：「今晚溫拿工作完畢後晚飯開會，忽然有兩大好友分別衝進房間強烈要求不准我們作告別演出，真是太有心了！」

校長嗌一齊跑步

同時阿倫亦上載了一段溫拿五虎和周潤發做運動的短片，當中可見六人一字排開作勢跑步，周潤發更說：「校長叫我哋跑步。」洋溢歡樂氣氛。昨日阿倫接受電話訪問時表示當日全日都為演唱會拍宣傳海報，然後就齊齊去開餐，他說：「食食吓飯突然有個口罩佬失驚無神走入嚟，我定一定神睇真啲原來係發仔（周潤發），我一見佢就問佢做咩瘦咗咁多，點知佢就話我肥咗好多，跟住仲教健仔同阿強跑步，又約我跑（行）山。」

周潤發向阿倫反映，香港有三分二人都唔贊成散Band。

阿倫上載溫拿晚飯開會時被突襲的情況。

阿倫表示跟周潤發認識超過近40年：「我哋做溫拿嗰陣佢都仲係茄哩啡，我仲記得佢幫港姐拍宣傳片時騎住隻白馬，不過英雄莫問出處。」問到周潤發是否有要求溫拿不要散Band？他說：「佢有話絕對唔可以散，香港有三分二人都唔贊成。」

外國歌迷感不捨

輪到郭富城獨自拜訪，阿倫直言：「城城直情對健仔有少少責備嘅口吻叫我哋唔好解散，其實近日有好多人都有同我講，仲試過有個外籍歌迷叫我哋Never Say Goodbye。」至於一直盛傳健仔屬散Band的提議者，問到阿倫近日對方可有回心轉意：「未呀，佢都係話到時睇吓點啦，我哋咁多年朋友唔方便逼佢太緊。」

文：音樂組