謝安琪識人多唔使黐老公
謝安琪（Kay）、麥浚龍、周柏豪等前晚出席音樂獎頒獎典禮，五度獲得「最佳女歌手演繹獎」的Kay表示當年不熟同行，只能當與老公張繼聰撐枱腳，但現在愈識愈多人，已建立出歸屬感。
歌手謝安琪（Kay）、麥浚龍（Juno）、周柏豪等前晚出席音樂獎頒獎典禮，Kay更五奪「最佳女歌手演繹獎」，剛從西安趕回來的Kay坦言感到驚喜：「原來我第五次拎，我出道十年，呢個由行內投票，所以好鍾意嚟，十年前我唔識同行，嗰時同老公（張繼聰）好似食二人晚餐，但每年識多啲人，有種歸屬感。」
開心IU翻唱廣東歌
Kay透露日前到大陸各地做宣傳，雖然自己唱國語歌的時間不長，但慶幸在大陸演出時反應熱烈，演唱《囍帖街》時粉絲亦能跟着唱，問有否聽過韓國女歌手IU的版本？她表示：「有，佢唱完同行已通知我，好開心！（感動？）佢做咗好多準備工夫，記廣東話歌詞係想像唔到咁難，我試過自彈自唱韓文歌，都要花好多時間練，好開心佢咁有心機。」至於老公張繼聰獲黃秋生大讚，Kay指得知消息後有問老公，但對方只平淡回覆一句：「Yes」。
Juno再見阿嬌冇尷尬
至於Juno日前缺席頒獎禮被指是避開前緋聞女友鍾欣潼（阿嬌），對此他解釋：「嗰陣錄緊歌同拍廣告所以冇出席，唔係話避咩人。」他亦表示再見面不會尷尬，問到會否出席其他頒獎禮？他則指要視乎時間：「新戲喺農曆新年後開拍，要做前期。（會去睇Twins演唱會？）撞咗時間，但都恭喜佢。」
周柏豪則是第二年奪「下載歌曲」獎，問到公司投資在他身上的錢是否已回本？他笑言：「新人嗰時老闆話『有冇法拉利睇你(0架)啦！』（佢買到未？）佢冇停過，唔知關唔關我哋事。」
文：音樂組
攝：秦健輝、吳文聰