張智霖談情說性解魔童疑惑
【老詠誼澳門直擊】張智霖（Chilam）與佘詩曼於澳門宣傳新片《十月初五的月光》，15年後再演「初哥哥」，已成家立室並育有一子的Chilam慨嘆變化很大，他透露仔仔魔童與他同樣眼淺，更會與他討論生理問題，笑言要平靜面對。而阿佘則笑言自己當年似「豬仔包」！
張智霖、佘詩曼、薛家燕、唐文龍、鄭欣宜等昨日現身澳門街頭派餅，宣傳《十月初五的月光》電影版。相隔15年再演「初哥哥」的Chilam感慨表示：「15年嚟變化都好大，以前自己單身，依家有家庭、有仔，心態上都成熟咗。」
分享男人心事
該劇近日重播吸引不少劇迷追睇，問仔仔有否追睇他的演出？Chilam說：「太夜喇，我有畀佢睇DVD，佢有問點解Daddy喺套劇唔講嘢。個仔遺傳咗我眼淺，睇到啲劇情會喊！（見佢喊有咩感覺？）好開心，不過會同佢一齊喊，兩父子都係性情中人！」問到仔仔有否與他分享男人心事？Chilam透露：「個仔會問我男性生理上嘅問題。（覺得驚訝？）有呀，但唔可以表現出嚟，要平靜。（有冇講鍾意女仔？）有呀，佢淨係同我講！（有冇教佢點揀對象？）呢啲唔使教，好睇佢嘅緣分，有同佢講『無論幾多段感情都好，都要對個女仔好』。」
阿佘自嘲豬仔包
而阿佘亦有追睇重播，她笑說：「（我）成個豬仔包咁！（想keep到當年咁？）唔同階段有唔同狀況，當時都要切合番套劇，有啲Baby fat，今次劇情講結咗婚，仲有抑鬱，所以就會瘦啲。（同Chilam隔十多年再合作有冇分別？）又唔係好大，大家大個咗咁，最大分別佢今次都開口講嘢。」至於薛家燕則大讚二人演技進步，又透露發現有男士向鄭欣宜行「注目禮」，她說：「今次好少八緋聞，但拍戲嗰陣見到有人（目及）欣宜，睇得出啲男仔對佢嗒晒糖，係唔敢行近同佢傾偈！我頭先都有同番佢講，佢話『係咪我食啲嘢好食佢哋先望咋！』我話我後生嗰陣都好多人咁望！」