林子祥恨創先河紅館開早場

殿堂級歌手Lam為慶祝入行40周年，於明年1月28日至30日假紅館舉行威利來干邑呈獻《林子祥佐治地球40年演唱會》。昨日Lam為個唱舉行發布會，獲母親、太太葉蒨文（沙麗）、兒子林德信（Alex）、女兒林德懿、女婿及孫女到場支持。

孫女唔知歌手身份

由於個唱反應非常熱烈，Lam宣布將加開1月31日1場。主持問他可會再加場？他笑說：「再加都得，因為我平時好早起身，我可以做早場，未試過，早o的仲好o的。（幾點？）9點、10點都OK。」之後Lam獲贊助商送上一支有40年歷史的法國醇酒，與他入行至今年份一樣，祝他愈唱愈醇。

對於全家總動員前來支持，Lam說：「我孫女就快3歲，我阿媽就93歲，年齡隔好遠，但好開心個個都o黎同我慶祝，一世人難得有o的咁長o既周年演唱會。」他又指孫女仍未知自己是歌手，有次在電視機看到自己覺得驚訝：「佢『哦』一聲，突然認到我，奇怪點解我會係電視出現。但佢好鍾意聽我o的歌，特別係快歌，會郁o黎郁去，好似o個個boxing婆婆咁。」

即興邀嘉賓上台唱

Lam透露將會邀沙麗和Alex一起合唱：「今次有o的歌需要三個人一齊唱，分別唱都有o既。」可會有其他嘉賓？他笑說：「或者會o架，但個個都好忙，我唔會叫人一定要o黎，分分鐘o個日睇吓有邊個係度，即興搵佢o地上o黎，好過講定晒。」再問是否真的加開早場演出？Lam坦言先視乎剛加開一場的反應如何：「日場就好多人做過，早場就冇，應該會幾特別，但唔知紅館得唔得。」

文：音樂組