古天樂45歲牛一 Joey 君如 輪住咀
昨日是型男古天樂45歲生日，一班圈中好友容祖兒（Joey）、吳君如、古巨基及傅明憲等，前晚為他舉行生日飯局，實行群星拱照壽星古仔！基仔在社交網站上載慶祝片段，片中有人突然熄燈，捧住生日蛋糕，眾人大唱生日歌賀古仔。當古仔吹過蠟燭後，向來識搞氣氛的君如向他催婚：「快啲娶老婆！」當古仔拿着膠刀切蛋糕時，君如再搞爛Gag：「你揸住嗰把係咪小李膠刀？」令到壽星仔哭笑不得。
劉浩龍同場冇入鏡
至於祖兒竟祝福古仔「皮膚日日都咁黑」，相當搞笑，之後再派出基仔先向壽星送吻，君如吻賀古仔前作狀舔脷並說：「呢個真係我Honey嚟！」而怕醜妹上身的祖兒先問古仔：「我錫唔錫得你？」古仔哈哈大笑道：「梗係得啦。」二人相擁錫面後再拍攝合照，古仔頻頻叫祖兒男友劉浩龍入鏡，可惜最後仍未見「龍」蹤。
另外，祖兒日前到王菀之（Ivana）的音樂會捧場，當晚Ivana大晒音樂才華，表演多種樂器，更化身成指揮家，指揮由父母和聲樂家組成的合唱團演唱。不過由於今次與香港管弦樂團合作，令她精神極度緊張：「我有三日冇好好咁正常食飯，因為一食嘢就屙，我食緊感冒藥壓制住啲菌先，不過好在食藥可以保持把聲狀態好啲。其實肚屙都好呀，咁唔怕着唔落件衫。」
文：音樂組