小齊為勢所逼紅館補求婚

由任賢齊、黃家強、蘇永康及梁漢文組成的男人幫將於11月27至29日假紅館舉行《男人幫演唱會2015香港站》,四人近日於網上收集男性歌迷的問題,並逐一為他們解答,其中有男歌迷向四人詢問當初如何求婚,小齊竟自爆從沒向老婆Tina求婚,令其他三位兄弟直指過分:「你好衰吓喎!你淨係註冊為BB呀?」更提議小齊於紅館騷上補求婚。另外,有男歌迷指與女友分手後,前女友謂只要Beyond復合就願意重拾舊歡,家強即說:「其實要Beyond復合係冇可能,個女仔係想講,你唔好再搵我啦!」