安志杰浪漫求婚 JC感動喊爆
拍拖一年的男星安志杰（Andy）與「警鐘胸」女模Jessica C.（JC）日前現身活動時默認女方有孕，Andy承諾兩人去完拍拖一周年旅行後，便會有好消息公布。昨日Andy終於找數，並做個負責任的男人，他透過經理人承認JC已懷孕三個多月及在馬爾代夫求婚成功，雙喜臨門！
安志杰（Andy）與Jessica C.（JC）去年因合作電影而擦出愛火花，日前兩人出席活動時，JC肚凸凸現身並默認有喜，昨日男方透過經理人正式公布喜訊，承認JC懷孕三個多月及求婚成功，明年榮升人父及人夫。
生B後行禮
Andy的經理人表示Andy與JC於本月14日出發往馬爾代夫旅行慶祝拍拖一周年，Andy在行程中為女友炮製驚喜：「Andy為JC搞咗個驚喜求婚派對，JC事前唔知情，Andy喺馬爾代夫租咗個私人沙灘，搭咗帳篷，預備咗蠟燭、鮮花、戒指，當Andy拎隻戒指出嚟向JC求婚時，JC已經眼泛淚光，之後Andy向佢承諾會照顧佢一生一世，JC即時喊爆。隻戒指係Andy自己設計，再搵人訂造，寓意一生一世，佢哋22號返港，到時再接受大家嘅祝福。」
婚禮方面，經理人指由於JC現懷孕三個多月，會待小朋友出世後才舉行婚禮，故最快也要明年才實行，她又表示：「佢哋性格好夾，已經見過雙方家人，大家都默認對方，Andy來港十幾年，佢好慶幸搵到另一半，JC都覺得Andy好有責任感，係可委以終身嘅男人。」
回美國待產
另Andy昨日向傳媒及在社交網站上發放求婚照片，相中兩人在沙灘中的帳篷內共進燭光晚裝，沙上還畫了一個巨型心形，非常浪漫；還有Andy設計的玫瑰金鑽石戒指相，鑽石估計逾兩卡；而最大亮點是兩人在遊艇上的照片，以泳裝上陣的JC，上圍澎湃，懷孕後升cup不少。
至於JC的經理人則表示JC會於本月尾現身活動，問到其的工作安排，她說：「JC有份拍嘅大陸劇預計明年夏天播出，到時佢已經生咗，可以配合宣傳。（佢哋會唔會喺香港註冊及擺酒﹖）暫時未有計劃。」她又指JC懷孕後依然有跑步同健身，她將於12月回美國與家人度聖誕，據知會留在當地待產。
文：名人組