Yanny求愛唔想做沒女
組合Super Girls成員Yanny（陳穎欣）是隊中最文靜的，雖然其冷酷一面獲封「冰山美人」，但慢熱的她往往被誤解為「寸爆」及難捉摸，幸好未有嚇怕廣告商及電影公司，反而工作量比其他成員多，堅持自我的Yanny承認性格極端，絕不會為討好任何人強迫自己「交戲」。入行多年的她愛情路上卻交白卷，Yanny坦言圈子窄難識對象，更擔心性格問題成為「沒女」。
怕醜累事唔出聲當寸
好多人都話我係「冰山美人」，可能覺得我成日唔出聲。好多人第一次見我都會覺得我好寸、難捉摸、難接近，但有啲人又會覺得我好乖、好純情、似小白兔、易接近，其實我性格好極端，一面係靜到好似起咗牆咁，另一面就係癲，癲到啲人都嫌我煩，我知因為咁嚇走好多人。反而我覺得自己太怕醜，對住父母都會怕醜，好似父親節送卡畀爸爸，我會笑住話父親節快樂，笑到好假嚟掩飾內心怕醜嘅感覺。
因為怕醜唔敢將內心嘅愛講出嚟，試過令初戀男友唔開心，當年情人節佢送咗束玫瑰花同整牛扒，我只係講咗句多謝，佢就有啲唔開心，覺得我一啲都唔感動，其實我只係怕醜，驚自己做出一啲嚇親佢嘅行為，有時我都會好嗲，不過唔係咁鍾意自己咁，之後我都有同佢解釋。
做人最緊要開心
Super Girls有時會分開各自工作，我覺得做人就係咁，好多機會唔係話自己等就得到，係一個際遇，自己信基督教，覺得神會為我安排咗好多嘢。雖然我都幾負面，不過好快調節番自己，覺得做人最緊要開心。當然都有低潮期，我面皮薄同好脆弱，初入行做model時好多人一齊去面試，跟住就等消息，但次次都唔揀我，當慣咗呢個模式就會變得堅強。
好多人覺得我哋私下會比較，呢個就係睇你點睇，負面嘅就同人比較話自己乜都唔掂，當轉個角度去諗，有一個好機會時可以帶落嚟畀其他人，咁呢件事就扭成正面，個人都會開心啲，所以永遠會選擇一個開心方法去諗嘢，當然好多時隊友機會比我多，我都會檢討係咪未夠好、未夠努力，如果我落後咗可能遲啲就冇人鍾意我、冇機會，要去諗點努力去做好自己，而唔係憎對方，咁樣冇意義，我唔會做啲咁嘅嘢。
每個人都有情緒，自己唔開心就會唔出聲，平時喺屋企幾多嘢講，阿媽見我唔出聲，盡量會畀我冷靜，之後我控制到情緒時，就會同佢哋講番我咩事唔開心，好少喺屋企人面前喊，始終唔想佢哋擔心我，反而我試過同隊友Jessica講到喊。我係一個慢熱嘅人，做呢行係唔可以，所以去一啲場合會營造自己好多嘢講，其實好攰開緊能量燈，燃燒緊能量，所以返到屋企唔想講嘢。
揀男友心地好愛環保
入行之後真係冇拍拖，或多或少都關我性格事，我唔主動識人，啲人見到我都嚇親，我日日見住都係幾個女仔，好難識到男仔，唉，我都擔心嫁唔出，自己又揀擇，希望另一半心地好，有高尚人格情操、愛呢個世界、愛環保同地球，都係嗰句，神會安排呢個人畀我，只係未到。
我會唔會成為沒女？如果依家畀我遇到心儀對象會主動撩佢傾吓偈，我同之前男朋友糾纏咗一年，佢一直唔知我鍾意佢，甚至乎以為我唔會鍾意佢，佢唔敢追我，點知當佢鍾意另一個人時，我就主動同佢表白，跟住我哋就一齊咗，之前佢講我知一直覺得我唔鍾意佢，所以我真係要改吓自己性格。
後記
筆者不得不承認在Super Girls五個女仔中偏愛Yanny，全因她們初出道時的一篇新人專訪，當時Yanny坐在最邊位置，整個訪問全由其他成員發言，靜靜的她偶然點頭和應姊妹的說話，就因為其「冷酷」一面令筆者着迷，可惜見多幾次、吹多幾次水，其「傻更更」的另一面表露無遺，所說所做的全是「無厘頭」，卻氹得人哈哈大笑，怎能不愛呢！
筆錄：羅宛君
攝影：劉斌
服裝：Zalora