張智霖變態執導搵杏兒報血仇

蕭定一旗下的「廣州映聯萬和影城」前日在廣州正式開業，為配合鄭中基主演的電影《猛龍特囧》於本月23日內地上映，蕭定一前晚就以中國3D數碼娛樂公司老闆身份，在影城主持「廣州映聯萬和影城開業慶典暨猛龍特囧首映明星見面會」，更率領其麾下的藝人晒冷撐場，當中包括張智霖、胡杏兒、周秀娜、王宗堯、張建聲、何佩瑜、鄭欣宜和唐貝詩等，場面星光熠熠。

怕失控禁妻出演

身為蕭定一旗下的「一哥」，Chilam甫到場就已經有非一般的浩大聲勢，在場守候多時的粉絲不斷高呼「Chilam、初哥哥」，場面震撼！而以VIP身份壓軸出場的他，自言一直有構思劇本，亦不時將想法向老闆分享，更在日前想出一個有關復仇的變態血腥劇本，打算交給胡杏兒主演，Chilam說：「佢夠晒變態啦！」而他又自爆來年有執導筒的計劃，轉戰幕後，實行「演而優則導」：「明年都有做導演嘅打算。（搵老婆袁詠儀拍？）我驚我控制唔到呢個演員，被佢威脅番點算？（你大晒o架喎！）理論上就係。」

（後左起）鄭欣宜、雨僑、胡杏兒、周秀娜、何佩瑜、唐貝詩 （前左起）楊建平、鄭中基、胡耀輝、蕭定一、張智霖 蕭定一（前右二）率領旗下藝人及拍檔祝酒賀影城開業。	張智霖演而優則導，相信撐場的粉絲舉腳贊成！	張智霖處男執導玩變態題材，笑言唔敢搵老婆演出。

眼見老闆愈做愈旺，Chilam亦為對方感高興：「佢愈成功，我哋就愈多資源做愈好嘅作品。希望簽更多嘅人，等公司強大啲，拍多啲inhouse嘅電影。」向來甚有投資觸覺的Chilam亦表示內地電影業暢旺，想向老闆夾番份開影城，叉半隻腳做「娛樂大亨」，他更謂：「下次叫佢畀我侵少少股都幾好。」Chilam表示除想和公司同事合作拍戲外，亦想與他們大賣歌喉：「好多人都好唱得，應該一齊出騷，可能好快成到事，又可以走唔同地方。」

神經質做殺人犯

至於最近加入蕭定一公司的胡杏兒，踩住5吋高踭鞋到場。談到未來拍攝電影的計劃，正忙於在天津開劇的杏兒笑謂：「我驚時間唔夠用。」提到Chilam在台上笑言想搵杏兒飾演他的囡囡，杏兒指對方純屬搞笑：「其實我想做殺人犯，冇咩試過呢啲。（變態角色難抽離？）我都覺得自己幾變態，做得演員都有少少神經質。」談到無綫有不少藝人離巢，她就指堅持自己想法便可。杏兒稱最近苦於熟讀劇本：「個角色係律師，第一次國語現場收音。」但她也有留意陳凱琳演技：「佢做得幾好。」並指該給機會讓她繼續進步。