Miranda硬食鹹豬嘴

澳洲名模Miranda Kerr前日以短裙晒腿Look亮相巴黎時裝騷，吸引大批傳媒喪影，正當她陶醉於閃光燈之際，烏克蘭「玩嘢王」記者Vitalii Sediuk突然衝向Miranda身邊，伸出「鹹豬嘴」偷啜其面珠，Miranda表現淡定冇尖叫變樣，只是呆一呆，還Keep住高貴靚樣行入會場，之後保安就上前驅趕Vitalii離開，這位「玩嘢王」又一次得手！

安娜受嚇零驚恐

今次並非Vitalii首次於巴黎時裝周「作惡」，日前他於另一時裝騷的會場外，見到雜誌《Vogue》總編安娜溫圖爾（Anna Wintour）現身即衝上前嚇對方，不過出名Cool爆的安娜就當他透明，面不改容。而前日的時裝騷還吸引了新「邦女郎」賽多克斯（Lea Seydoux）及影星沙拉保夫（Shia LaBeouf）舊愛Mia Goth等。

徐濠縈陪老公跑

而同日出席時裝騷的徐濠縈則透露今天便返港，問她在巴黎經常趕看騷會否感辛苦？她說：「都唔係好辛苦，但有時睇完要再去幫舖頭買貨就攰啲。」提到本港將舉行馬拉松賽事，阿徐稱仍未報名，有指參賽者人數遠多於名額，網上甚至出現炒名額情況，阿徐笑謂：「中國人真係勁，連馬拉松都要炒。我諗我會報到名，因為有運動品牌幫我報，老公（陳奕迅）今年負責為馬拉松唱主題曲，所以點都會報到名，我叫佢報埋先，如果佢跑，我會陪佢。（拖慢你？）都係，鍛煉吓佢。（唔介意破唔到自己紀錄？）都介意，但香港好難破紀錄，因為啲路高高低低，而且起步我又企得後，好難衝出重圍。我有次喺東京跑條路好平，大會又安排得好，就可以。不過今次陪老公唔諗破紀錄，因為我要跑短途陪佢，佢只可跑十公里，都唔知佢跑唔跑到，所以我要降班就佢。」

文：外娛組