盛品儒豪搶新娘派百萬開門利是

盛品儒與太太蔡一鳳去年已註冊結婚，昨假中環四季酒店補擺喜酒，筵開41圍。盛品儒昨早乘坐勞斯萊斯婚車，率領8部名車到場接新娘。手持玫瑰花球的他，不時揮手兼晒勝利V字手勢稱心情緊張：「聽聞玩新郎幾變態，有啲驚，不過唔緊要，娶老婆係咁。（準備好開門利是？）現金就冇，支票就有。（任佢哋填？）唔係，要拗吓數。（畀身家老婆？）已經用晒成副身家。（婚禮用咗過千萬？）冇計過，完咗先計，已經over budget（超出預算）。之前買屋、買公司都用晒啲錢，買得七七八八。（寫老婆名？）係。」

兄弟團扮佳麗選美

下午1時15分盛品儒與穿裙掛的蔡一鳳步出酒店，新娘滿身金器。盛品儒自爆付上999,999開門利是，寓意長長久久。現場8位姊妹每位分得12萬5千元，認真和味。

8位姊妹每人分得12萬5千元的開門利是，認真和味。	盛品儒笑言造人好easy，仲要生夠四個。	利嘉兒

他透露接新娘期間要着cosplay，戴皇冠扮選美佳麗，因本身着中式禮服，再外穿裙子，明顯太窄致裙子變成大跌膊，兄弟更要扮barbie。蔡母和新娘在斟茶時亦感動得眼泛淚光。問到造人大計，新郎說：「呢啲難度唔高，好容易，無乜問題。（今晚一擊即中？）未必今晚，今晚可能好攰，要預個日子，生四個，東南西北。」問到兩人給予對方多少分，盛品儒給太太99分，蔡一鳳給丈夫80分，因要有進步空間。二人下月到大溪地度蜜月，順道慶祝註冊結婚一周年。

利嘉兒穩袋12萬5千

任伴娘的藝人利嘉兒，大爆盛品儒宣讀愛的宣言時臨時「玩嘢」：「佢將愛的宣言掉轉晒嚟讀，將『你凍我幫你蓋被』變成『我凍你幫我蓋被』、『第日人工畀晒你』變成『第日人工畀少少你』，『一生一世愛護你』變做『唔知乜乜唔理你』等。每講完一句就話sorry講錯咗，專登玩嘢，以為新娘聽唔到，但其實我知佢好緊張。」對於開門利是大豐收，她指原開價100萬，笑言減一蚊已好仁慈，問她12萬5千如何用？她說：「佢封得利是畀我，我都要做番人情畀佢哋，仲有之後如果佢哋有小朋友，滿月又一份，分分鐘要倒貼！」

文：名人組