黃智雯床戲挑逗陳山聰心動
陳山聰及黃智雯（Mandy）最近於無綫新劇首度合作，二人表現合拍兼不時互窒放笑彈！當中山聰揶揄Mandy「天然呆」之餘，更大爆於劇中以酒「兜頭淋」對方。Mandy見狀即爆笑「吐真言」：「其實嗰吓我好想兜巴星佢呀！」
藝人陳山聰及黃智雯最近於無綫劇集《張保仔》中首次合作，山聰率先大爆外表冷艷的Mandy經常於片場陷入「天然呆」狀態：「之前唔識佢以為佢好Cool，之後發現佢其實只係發緊呆，佢『天然呆』起嚟仲勁過馬國明呀！我同佢講劇本時十問九唔應，仲心不在焉！」慘被踢爆的Mandy聞言即扭對方耳仔「還擊」，又搞笑暗寸山聰年紀大：「我好細個就睇佢演舞台劇，當時我覺得佢好靚仔，佢令我對舞台劇有興趣！（啟蒙人？）係(口架)！」
潑酒幾乎動手
談到兩人於劇中化身鬥氣冤家，山聰坦言當中不慎以酒「兜頭淋」Mandy，令對方即場Ｏ嘴：「我哋有場潑酒戲，佢好心唔想潑到我塊面，但佢估唔到我一轉身攞杯，就啱晒位兜口兜臉潑佢！」Mandy直言嬲到想「兜巴摑」對方：「我哋當時（投）入晒戲，其實嗰吓我好想兜巴星佢呀！」
演名妓考演技
Mandy又透露首次飾演名妓，更要身穿性感肚兜挑逗山聰：「眼神同手勢上要撩佢，但唔會身體接觸。我哋喺床上拍嘅，但畀我感覺似跳緊舞。因為要用身體表達，成個人要放軟晒。」而山聰笑言為此一度動心：「咁一定有(口架)啦！我仲讚佢做得好，佢做開硬朗角色，突然做啲有心計同嫵媚角色，完全唔係佢嚟，真係考佢演技喇！」然而戲內不時互窒的二人於戲外更聯同龔嘉欣及樂瞳等早前於橫店拍外景時，抽空齊到西湖遊玩，可謂相當老友！
文：影視組
陳山聰髮型：hair culture@Seiko Sin及服裝：my dress.com