阿Sa「打劫」老竇 還飛債
為慶祝踏入樂壇十五周年，Twins將在年底舉行跨年演唱會，並預告到時有大量勁歌熱舞和精心設計的舞台。記者會上兩人更承諾會重現她們經典的「側手翻」，蔡卓妍（阿Sa）更笑指飛債纍纍，要向老竇攞飛應急。
Twins籌備整年演唱會《#TWINS #LOL #LIVE IN HK》，將在今年大除夕開始，一連三場於紅館跟歌迷跨年獻唱，昨日阿Sa和鍾欣潼（阿嬌）現身記者會，活動中先播出兩人以狙擊手打扮的宣傳短片，然後就宣布加開一月三日，合共四場演出，同時又提到網上驚現有人在門票還未公開發售前，已開始兜售除夕夜第一行的門票，兩人呼籲歌迷們要警惕，阿Sa更表示：「近來騙案特別多，歌迷要小心。」
希望再加多幾場
而今次演唱會的舞台經精心設計，兩人透露花費不菲，同時將配合連場勁歌熱舞，司儀問到Twins經典的「側手翻」動作可會重現？阿Sa笑說：「既然徇眾要求，大家真係咁想睇，都可以嘅。」又提議邀請經理人霍汶希（Mani）和吳雨表演一字馬和跳火圈，而阿嬌則稱想請謝霆鋒到來表演。
黐九十後有活力
Twins久未合體開騷，令歌迷相當期待，她們亦笑言飛債纍纍，加一場相信未夠應付，阿Sa更連爸爸的飛都拿作應急，她說：「有內地歌迷話已經訂晒酒店機票，但買唔到除夕晚嘅飛，所以就讓阿爸啲飛畀佢哋，搞到佢要打畀Mani求救。」
講到今次表演舞台花費驚人，阿嬌直言唔好浪費要再加場：「最重要係個台唔可以帶返內地巡迴，唔想浪費，所以希望可以表演多幾場！」而近來正加緊排練應付到時的大量快歌，阿Sa稱：「所有Dancers都係九十後，佢哋好有活力，我哋拍埋一齊變得都好有活力！」
文：音樂組