洪天明踢爆被周家蔚呃
藝人洪天明從小跟隨父親洪金寶在片場打滾，由黃毛小子至今，天明已年逾40歲，更是兩子之父，經歷不少起跌的他，已銳變成飽經歷練的大男人，他感激太太周家蔚為了持家而犧牲事業，他說：「家蔚的外表欺騙了大家！」
洪天明予人感覺很「大細路」，其實他已年過40歲，也是兩子之父，而天明在事業上一直默默耕耘，直到早前他在劇集如《潮拜武當》、《拆局專家》等擔當要角，交足內心戲的他演技更趨成熟。
做事要有計劃
天明坦言目前以家人為先，不再好像以前般貪玩：「依家會識得諗後果，我會怕危險，萬一我受咗傷，就會影響拍劇，拍唔到劇就會遲咗畀錢屋企。每個決定唔止影響自己，仲有兩個仔同老婆。」對家庭，天明想令家人過更好的生活：「以前搵完錢就餐餐清，依家唔同晒，要有plan，仲要儲起一筆基金，所以我要更加更加努力！」
演員向來被動，由監製決定找誰拍劇，未必努力就有成果。自小天明跟隨父親洪金寶在片場打滾，注定食這行飯的天明說：「演藝圈收入唔穩定，好睇天時地利人和，老竇試過拍完一部戲，等咗年幾都冇工開，當時佢諗過去學廚，之後就做大廚。後來又突然有戲搵佢，咪繼續拍戲，呢行就係咁！」天明熱愛演戲，希望將來能夠全職做生意，有穩定收入就可為興趣兼職演戲。
天明作為家庭支柱，又要兼顧事業與家庭，太太周家蔚背後的支持相當重要。談到太太，天明笑言家蔚的外表欺騙了大家：「冇錯佢外表好純，其實佢實質唔係咁純！佢係個性情中人，好講義氣，對朋友好好。」選美出身的家蔚，為了家庭放棄事業，天明說：「佢唔係追求名利，佢用心對人。大家都貪玩，但佢為咗家庭可以放棄好多！」
不會強迫兒子
大仔洪大仁今年兩歲，細仔洪竟琋（JT）近六個月大，天明自言還是個新手爸爸，要不斷學習、吸收經驗：「自己要慢慢摸索，搵出適合佢嘅方法，我哋都做過年輕人，知道愈係唔畀佢做，佢就會愈想去做。」至於對囝囝的期望，天明覺得要遵從他們意願，不能強迫：「我會畀佢做自己鍾意嘅嘢，就算搵幾多錢都好，但要日日坐office十幾個鐘兼受人氣，我唔會鼓勵佢打呢啲工。」文：專案組