陳嘉桓自認貪玩「鬼」 搵癲男壯膽
女星陳嘉桓（Rose）日前率先試食萬聖節「鬼餐」，面對逼真的「殘肢」食物，Rose交足戲擺出驚嚇表情！愛玩鬼屋的她自嘲又要驚又要玩，揀男友一定要夠大膽，可陪她齊齊癲！
踏入萬聖節月份，陳嘉桓（Rose）日前到海洋公園試食應節「鬼餐」！Rose自言重視萬聖節，兒時在外國會問鄰居攞糖，求學時更已有「扮鬼」喜好：「讀書時大家整咗個鬼屋，我扮貞子，長髮遮面搽白塊臉再披白布，要跪喺枱底爬出嚟，跪咗幾日，膝頭瘀晒，好在冇人踢我咋！呢段回憶好難忘！」
嚇親細路
長大後的Rose則愛變裝玩鬼屋，最難忘扮公主及黑天鵝造型：「扮公主嗰年，我喺塊臉畫咗裂痕加紅唇，結果嚇親小朋友！我好鍾意萬聖節化好誇張嘅妝，可以完全做另一個人，就算當日有人認到我係Rose，我都唔認（口架）！」問到是否大膽之人？Rose笑言自己又要驚又要玩，但已比不少男士大膽：「試過保護番啲男仔，我嘅經驗係偏瘦男仔係細膽啲，我細佬都好瘦，我明知佢驚，就會推佢去前面！（揀男友要大膽？）要（口架）！我鍾意挑戰學好多嘢，又鍾意去樂園玩，人生想有多啲特別經歷，另一半要陪我癲！」
嚇大胃口
講到今次的海洋冰室萬聖節餐以盂蘭節做題材，食物內有墓碑、手掌、手指及眼球等驚嚇設計，餐廳更有紙紮公仔做布置，Rose大讚得意，並交足戲做出搞鬼表情：「小朋友見到可能驚，我就唔驚，反而食欲大增！平時我係相機食先，如果賣相特別，我會影得更落力，食得都會更開心。」 文：立影 攝：劉斌 場地：海洋公園