黃愷傑載父母升空
藝人黃錦燊與趙雅芝兒子黃愷傑（Wesley）早前參加內地真人騷比賽，用三個月學會揸飛機，結果勝出，獲准駕飛機載雙親飛上天空，Wesley自爆載父母飛行心情勁緊張，幸勤於溫習加上教官出色，即使起飛、降落等難關亦能衝破，並期待有機會載女友翱翔天際。
黃愷傑（Wesley）早前參與內地真人騷比賽節目《壯志凌雲》，用三個月學駕駛小型飛機，結果Wesley憑出色表現，在比賽中力壓內地影星張雨綺及夏雨等奪冠，獎品之一是可駕駛飛機一次，Wesley特別邀請父母黃錦燊及趙雅芝做乘客，陪他飛上天空，令這次飛行更具意義。
重溫筆記冇蝦碌
Wesley昨接受電話訪問，自爆駕飛機時心情緊張：「載爹哋、媽咪上天空，心情好緊張，因為多咗兩個人，重量唔同咗，責任都重大咗。（起飛同降落難度最高？）航程中有機師喺我隔籬，但基本上係我自己揸，因為教官教得好，加上我每次上機前都重溫啲筆記，暫時都未出現過蝦碌嘢。（女友冇份坐有冇呷醋？）仲有機會，我都想請多啲朋友一齊飛。」
未儲夠飛行時數
Wesley又大談其「機師夢」：「揸飛機係我3、4歲起嘅夢想，當年有個小學同學個爸爸係機師，加上我見啲機師好型，所以都想做機師。依家我仲未有機師牌，因為未儲夠飛行時數。儲夠就可以攞小型飛機師牌，呢個係民航機師必經階段。（想朝民航機師夢想進發？）未必，因為再考上去要好多心機、時間，工作上未必配合到。」文：影視組