琦琦急飛米蘭 掃禮物補償

琦琦以最流行的西裝外套型格打扮赴會，笑言抵埗後即為家人掃貨。

【陳嘉敏米蘭直擊】琦琦於米蘭時間27日現身當地舉行的Dolce & Gabbana時裝騷，透露前一日才由倫敦飛抵米蘭，她說：「我喺倫敦做嘢，比預期早做完，就即刻飛過嚟，前後留三日就返香港，我都係最後一分鐘先確實到米蘭睇騷。」她說今年中秋一家三口分別在三地，老公任達華身在台灣，女兒任晴佳在港，而她則在米蘭，笑言上機前吃了一口月餅，當作應節，雖然中秋佳節不能與家人共度，但她抵達米蘭後，即急不及待替老公及囡囡掃鞋履買手信，認真廿四孝。

陳喬恩睇騷如去派對

隨後琦琦、陳喬恩和張栢芝終於在Trussardi時裝騷上碰面，各人齊坐頭排睇騷，穿V領針織衫搭配金色高腰裙的陳喬恩表示對鞋子情有獨鍾，最愛買又最愛看鞋，她說：「其實對我來講去時裝周就像參加一個盛裝出席嘅大party，可以見到很多朋友，非常開心；又可以學習一些搭配技巧，擴闊視野，睇騷嘅過程中，又可以吸收到唔同品牌裏面所蘊含嘅文化。」 隨後她更換一襲白色高衩長裙出席另一場騷，大晒長腿。

琦琦一家三口十分溫馨。	陳喬恩換過白色裙子，流露另一番韻味。	栢芝以自拍神器跟粉絲們來個大合照。

• 陳喬恩（左起）、栢芝與Chiara Ferragni坐頭排睇騷。

栢芝自拍神器冧粉絲

至於已逗留米蘭多天的栢芝，此場時裝騷成為她在米蘭的最後一站，穿吊帶低胸裝的她，與國際時尚博主Chiara Ferragni並排而坐，完騷後到後台與品牌創意總監見面後，便由四名外籍保安護送離開，於場外有半百粉絲等候，並要求跟她合照，栢芝見群情洶湧亦非常友善，還主動拿起自拍神器，跟粉絲來張大合照，冧盡粉絲。