陳展鵬下戰書開拖 洪永城劈卦恭候

藝人陳展鵬、洪永城（Tony）、陳凱琳（Grace）及傅嘉莉等，昨日以新劇《張保仔》造型現身宣傳。展鵬早前被傳因不滿貴為主角，但新劇焦點卻落在Tony身上，因而與Tony鬧不和。昨日二人碰面，展鵬在台上連番追擊，播放劇集主題曲MV時，見Tony為自己歡呼，即謂：「邊有自己嗌(O架)？」見Tony玩遊戲時，猴擒將Grace一攬入懷，即說：「戲入面係咁，現場都咁，人哋爹哋媽咪喺度(O架)！」不過其後拗手瓜時，展鵬就明顯讓賽。

叫鵬叔太招積

展鵬事後直認有心讓賽：「我係佢前輩，玩吓啫。多啲後浪出現好，最好推到我上岸，咁我就唔使做。（畀說話Tony聽？）唔係，跟番佢講嘢個tone啫，佢都叫我鵬叔。（嬲？）唔嬲，我個姪都咁叫我。（當Tony係姪？）佢本來叫我鵬哥，但呢行鵬哥得盧海鵬一個，咪叫鵬叔囉。唔緊要，我哋順應大家鍾意睇嘅去發展。我想打佢！係真打，佢咁招積，過多幾個禮拜就打！（有教Tony做戲？）佢使乜我教？計埋呢套，佢拍第4套，如果咁都吸收唔到，好難再上，佢嚟緊都做主角喇。」

陳展鵬台上狂寸洪永城，事後更揚言想打佢，火藥味濃。	洪永城玩遊戲時，猴擒地將Grace一攬入懷唔放手。	洪永城公然將陳凱琳攬到實一實，身貼身。

唔怕嘉穎呷醋

Tony對於展鵬下戰書即反擊：「好呀，我練定大聖劈卦迎接佢。（台上互窒？）有咩？搞氣氛啫。（佢有教你做戲？）有，畀好多意見我，佢資深，我唔識都問佢。（佢話你仲唔識吸收，好難再上？）咁我返去練習吓，下套再同佢碰吓，佢唔好再教我喇。（你叫佢做阿叔？）我叫佢鵬鵬，佢叫我城城。（你哋邊個演技好？）梗係佢，因為佢綜藝節目唔夠我嚟。（對Grace咁猴擒，唔怕人哋男友鄭嘉穎嬲？）點會嬲我呀？佢都唔小器。」

Grace則指不覺陳洪不和，對於Tony猴擒，Grace指嘉穎不會呷醋：「宣傳啫，拍劇都係咁。（中秋冇得同嘉穎人月兩團圓？）希望之後有機會補番。」文：影視組