基仔穿越巡唱 玩裸視
古巨基婚後首個世界巡迴演唱會即將開鑼，今次演唱會大玩穿越時空感覺及裸視，製作花費之大，連公司見到個數字都驚嚇，但基仔無視公司「詐型」，追隨通脹加歌酬的他信心十足的說：「埋數時見到會笑。」
基仔婚後首個「《我們》世界巡迴演唱會」下月10日在深圳揭幕，近日他忙於為演唱會排舞，每日跳足兩、三個鐘，他大爆演唱會以穿越時空做主題，大玩裸視立體影像，製作費預算極之龐大：「經理人Mani（霍汶希）睇到條數都嘩嘩聲，話條數好大！（擔心公司扣歌酬當補貼？）歌酬不但冇減，比以前多咗喎，我幾年冇開，通貨膨脹都要加少少，我幫公司搵到就得！」因已落實多個巡唱地點，他擔保埋數時公司睇到盤數會笑。
唔係裸體
今次基仔參與很多幕後工作，像舞台設計要營造一個穿越時空的現場感，造型方面會比較形象化：「我想做裸視立體影像配合，即係唔使戴任何眼鏡，就有立體影像感覺。（以為你裸體？）嗰啲係透視眼嚟！」又大爆為配合穿越時空主題，會設計一隻巨型時光機，他會在半空中登場：「其實我幾乎次次演唱會都係空中出場，可能覺得咁樣威啲。」
不會露肉
上次演唱會基仔狂操，大晒麒麟臂，今次他未有打算露肉：「我不嬲唔係賣呢樣嘢，今次都有操練，主要修身同唱歌夠氣嘅規格就夠喇。」演唱會中勁歌熱舞部分，他覺得聽覺、視覺都要豐富。太太Lorraine可會上台合唱？基仔說：「佢會喺台底，佢啲歌喉唔會喺台上表演。」既忙於準備演唱會，又要籌備11月的婚宴，日前基仔才去視察婚宴場地：「好多濕碎嘢要搞，真係頭都大埋！」此外，基仔為內地節目演秋晚，並扮演四大才子。
文：音樂組