嘟嘟子華 「世紀之吻」載譽回歸
《東網巨星》App為無綫經典劇重播舉行投票，結果喜劇《男親女愛》深受歡迎「由頭帶到落尾」，最終以熱爆姿態成為「經典之最」。身為男女主角的鄭裕玲（嘟嘟）及黃子華興奮非常，期待與一眾粉絲「深宵重聚」，一齊再見證「世紀之吻」，子華更叮囑有關方面加插NG片，以保持原汁原味！
《東網巨星》App推出《重播你有Say》，在《東網巨星》facebook讓觀眾選出無綫劇集「經典之最」，兩階段投票昨午4時順利結束。一眾視迷就10套經典劇畀likes，總瀏覽量更高達76681次，成績斐然！而嘟嘟與子華15年前主演的《男親女愛》最終獲得1291個likes成為「民選重播劇」冠軍，無綫鐵定根據粉絲們意願，10月6日凌晨12時15分安排《男》劇緊接《大鬧廣昌隆》重播。Miss Mo及余樂天的「世紀之吻」，以及「曱甴界icon」小強有待重現觀眾眼前，可謂萬眾期待！
加插NG片
當年《男》劇最高收視高達50點且掀起全城熱話，如今依然能「稱霸」深宵劇場，嘟嘟開心回應：「多謝大家嘅投票，套劇冇記錯已經係15年前嘅事，好開心咁多觀眾記得同埋想睇番，希望套劇能夠帶啲歡樂畀大家啦！」子華則建議謂：「其實除咗完整版本之外，NG片都好好睇，最好無綫方面可以剪埋落去播畀大家睇就更好嘞！」
處境劇經典
而投票中穩守第2及3位分別是獲828 likes、黃日華及劉嘉玲主演的《義不容情》，以及得557 likes、古天樂夥拍宣萱主演的《尋秦記》。無綫節目部總監杜之克對於網民熱烈畀likes回應表示：「《男》劇成為網上票選冠軍，有啲意外，但又合乎情理。呢套劇喺TVB晚上10時30分時段播出處境劇嘅代表作，當時明確標誌香港已經係中產口味主導嘅社會嘞，好高興有咁多網民對呢套劇有咁深刻印象同回憶，故事中樂觀生活不忘自謔的態度係香港人可愛嘅寫照。我哋同觀眾一齊重溫之餘，亦希望香港可以繼續愛下去。」文：影視組