周秀娜自我沉澱 鬆完再上

周秀娜（Chrissie）數年前以o靚模身份進軍娛樂圈，憑驕人身材配以甜美容貌成功為她帶來密不透風的工作時間表，不過，最近她從繁忙中逐漸學懂抽空，萌生化作卡通人物「Nananana」，透過布偶慵懶的個性帶出忙裏偷閒的態度，Chrissie說：「之前好想將時間填滿佢，依家發覺要學識調整自己個心態，有時要靜空一下，放鬆過後，或會做得更好。」

放假陪家人朋友

從現在回望，Chrissie感受到不同的時段，對人生的需求亦有所改變，現在的Chrissie希望能有更多時間陪伴家人朋友：「呢個時候可以選擇，容許自己咁做，起初不斷往外衝，係有團火，當然依家都有，做嘢認真做，但會畀自己放吓假，（放假做咩？）可以去吓旅行、陪吓朋友，做啲手作仔，油畫。」

周秀娜想好似「Nananana」咁，間中慵懶一下。

周秀娜自言擇偶條件並不苛刻，最緊要相處融洽。

首選高大乾淨男

惟Chrissie自與陳偉成分手後未見戀情進展，她亦認為感情事「急不來」，即使誇下海口希望在五年內找到伴侶，然而女人心分秒仍在變化：「依家咁講，遲啲就唔知，要做好眼前嘅嘢先，享受現時嘅嘢，等佢自然出現，冇預計嘅可能更好。」而女神心目中的男神條件亦不苛刻，以能夠相處融洽為目標，當然外形亦決定發展空間：「第一印象好緊要，要乾淨、高啲嘅男仔，不過遲啲唔知o架，即使係好吸引，相處唔到都唔得，唔會夾硬嚟。」

文：影視組

髮型：Daniel cheng @Amarone salon

化妝：Yannes@ND&Co.Co

場地：Chocolate rain