羅霖學泰拳 唔驚再遇暴力對待
藝人羅霖、陳爽及前主播趙海珠前晚出席頒獎典禮，羅霖指近日接拍動作電影，現正跟隨武術指導學習基本動作，但第一日已經撻到周身瘀痕：「導演叫我唔好太搏命，因為怕正式開拍時會周身傷痕，會拍唔到！（買重保險？）一定會！（局部位置？）我諗全身都要。好彩昨日係屁股落地，如果係腰就慘啦！因為練踢腳，一跣腳就撻低咗，膝頭同手掌位置都瘀咗。」
陳爽嫌唔夠性感
而問到曾暗示遭暴力對待的她，現時如再遇上不幸事是否已有還擊之力？羅霖表示絕對是：「之後會學泰拳，係一個好好減壓同全身出汗方法，唔可以太斯文，要用力打，自己未試過打人。（學完可以保護自己？）其實學番幾招係好事，機警啲，等人郁手時可以保護自己。（之後唔會再畀人打？）一定唔會！有咗第一次，就唔會有第二次！」
而以性感晚裝造型現身的陳爽，大方騷出四吋事業線，笑言是為了尊重場合，老公亦不太介意：「佢好支持我做嘢！呢件唔算好性感，可以再大膽啲！（咁老爺奶奶介唔介意先？）佢哋OK！好西化同支持我！最緊要靚，唔可以輸！」
文：名人組