王大業自認有腳雀仔 愛踏實
皮草太子爺王大業（Andy）鍾情時裝，不過他沒有追求成為設計師的浪漫情懷，反而腳踏實地接手家族的皮草生意。他面對愛情同樣踏實，單身的他無意當《阿飛正傳》中的阿飛，自認是有腳雀仔，只是仍未找到那片讓他落腳之地。
8歲跟隨家人移居加拿大的Andy，大學修讀時裝設計系，不過他畢業後選擇回港接手家族的皮草生意。他坦言大學時期已有接手的心理準備，亦不抗拒繼承家業，他笑笑口反問：「點解要抗拒﹖其實皮草同時裝都有關係。」至於有否想過當時裝設計師？Andy語帶滄桑道：「就算我真係做時裝設計，最後咪又變成一門生意，香港好難做時裝。有時明知條路係行唔到，我唔會仲行過去，我當然現實，應該話我係實際先啱。」
最着重互相溝通
今年35歲的Andy正步入四十不惑之年，但仍是單身貴族一名，有樣有錢兼單身的他拒絕「鑽石王老五」這個封號，他解釋：「我唔係鑽石級，又未去到呢個歲數，起碼要過咗四十，過晒適婚年齡先叫得王老五。」要他形容自己，Andy自稱：「我係有腳嘅雀仔，但未搵到另一半。」他自言對另一半要求簡單，最重要是溝通。
不介意女友整容
曾與女星莊思敏傳緋聞的他不介意與藝人拍拖，甚至女方整容或隆胸也可以接受：「我唔介意對方整容，微調可以，但我自己唔會整容。至於隆胸都可以，我冇諗過呢個問題。」Andy面對愛情依然實際，他理所當然地把愛情放在事業後。他沒有為自己定下結婚限期，笑言：「可能一兩年後結婚，可能十年都唔會結，只可以講一定唔會閃婚。」
文：陳嘉敏
攝：嚴偉國
場地：La Locanda by Giancarlo Perbellini