傅嘉莉放低包袱轉型做戲子
模特兒傅嘉莉（Kelly）最近下定決心轉型，與無綫簽下經理人合約，成為一個演員。她認為拍劇代入不同角色，豐富了她的人生，至於選角首要條件是不要似自己。
傅嘉莉（Kelly）近期與無綫簽下經理人合約，Kelly其實是第一代「四葉女」，早在2003年已經為無綫拍攝青春劇《當四葉草碰上劍尖時》，後來主攻模特兒工作。直到近年拍攝《衝上雲霄II》及《愛我請留言》後，令Kelly過足戲癮，下定決心由模特兒轉型演員，她說：「呢兩部劇令自己鍾意咗演戲，可以代入角色吸引我，拍劇豐富咗我嘅人生，自己仲後生，好捱得，之後任何角色都想嘗試，最緊要角色唔似自己。」
崇拜佘詩曼
劇集《愛我請留言》的角色為Kelly打響名堂，雖然角色誇張帶有口音，但她絕不介意做醜角，她說：「之前跟甄詠蓓老師學戲，佢第一日上堂就特別講，model要成為一個演員，首先要放低包袱。」在眾花旦中，Kelly最崇拜的是「一姐」佘詩曼，她說：「佢每個角色都入型入格，有啲好難嘅對白都可以講得好自如、好放，好想同佢合作，另外一個就係黎耀祥，佢演戲好紮實，好有味道。依家自己希望做好每個角色，每個角色都有進步。」
肉緊攬展鵬
Kelly在新劇《張保仔》扮演愛慕陳展鵬的角色，首次拍古裝劇的她最難忘是橫店寒冷天氣，她說：「自己好鍾意古裝，但係天氣好凍，連腳底都要貼埋暖包。仲有喺馬背上攬住陳展鵬，攬到展鵬唞唔到氣，佢話可唔可以放鬆少少，哈哈。」劇中與陳展鵬最多對手戲的Kelly從中學會古裝劇的節奏，她說：「古裝同時裝好大分別，掌握用語、說話節奏好重要。」
採訪：影視組
攝影：司徒國榮
髮型：Ray Mok@Fifth Salon