黃宗澤咀香香：佢肥得幾可愛

無綫台慶劇《無雙譜》演員黎耀祥、田蕊妮、黃宗澤和岑麗香為劇集到尖沙咀進行花車巡遊，向市民派月餅賀中秋。現場氣氛熱鬧，香香更以「鯉魚嘴」與宗澤扮錫錫，期間有人從後玩推撞，將香香推近宗澤，「哄得埋」到險令二人真咀。

宗澤稱香香在劇中是鯉魚精，所以扮「鯉魚嘴」來玩，劇中咀嘴場面都只是蜻蜓點水：「戲中我仲要成日孭香香添！」香香即自嘲當時肥，累到宗澤很辛苦，但宗澤識做未有嘲笑反而讚可愛：「香香嗰時係有啲肥，肥得幾可愛吖！但唔算辛苦，我都好大力！」

黃宗澤讚香香肥得可愛。	黎耀祥在尖沙咀派發紀念品，甚受街坊歡迎。	龔嘉欣（左起）、香香和田蕊妮被團團圍着。

想搵爽朗女友

祥仔則被問到繼年前演出劇集《名門暗戰》後，已有一年多時間未有他主演的劇集出街，最近無綫一連兩套上下線播出祥仔主演的《無雙譜》和《梟雄》作為今年台慶劇，問可覺自己打自己？祥仔說：「唔會覺得自己打自己，觀眾各有喜好。（候選視帝冇對手好悶？）唔會，好多新演員，好似張繼聰、王浩信，新舊交替係必然，可能遲啲我畀人炒呢！（擔心會成為歐陽震華例子不獲續約？）唔擔心！呢個係風水輪流轉，係時候要有新景象，多啲新演員係好事！」

而黃宗澤昨出席另一活動時透露將到杭州開工，會否在內地搵另一半？他說：「隨緣啦，依家冇乜緋聞，畀我可以識吓女仔。（想搵咩類型？）爽朗啲，唔好成日要我照顧。（有指前女友胡杏兒12月結婚？）如果係要恭喜佢，（聽聞無綫封殺佢？）係咩，唔知喎。（會唔會覺得公司小器？）咁又唔會，我聽聞佢有機會返嚟拍戲喎。」

無綫歡迎競爭

此外，無綫助理總經理區偉林昨為「傑出員工嘉許計劃」任頒獎嘉賓，向三位得獎者頒獎。對新電視台加入競爭，區偉林說：「無綫好似一間酒樓，每日都有新酒樓出現，係咪我哋就因為咁而改變自己呢？我哋對外面嘅東南亞競爭係歡迎嘅，可以激發自己努力啲，但最重要嘅競爭唔係喺出面，係自己過自己嗰關！」

文：影視組