Lisa S.撐環保 鼓勵囡囡做義工
名模Lisa S.、貝安琪（Ankie）及陳瑞瑩（Helena）昨晚一同出席《第15屆「清潔香港」大行動》酒會，當中Lisa表示支持該機構多年，更會到海灘清潔，不過近年要照顧女兒Raven，故難抽時間做義工，但對近年香港人的環保意識提高感鼓舞。問會否帶同女兒參與清潔海灘？她說：「一定會，不過佢仲細。尋日帶咗佢去淺水灣，佢玩得好開心，好多人要同Daniel（吳彥祖）影相，Raven喺隔籬問『點解冇人影我？』（知唔知爸爸係明星？）佢知爸爸會喺電視上出現，有時見到亞洲人面孔嘅海報，會指住嗌爸爸！」
談到兩歲多的Raven將入讀幼稚園，她表示有安排女兒上play group，問有否進行面試訓練？她說：「未，不過相信問題唔大，佢性格同我好似，好外向同健談。」另外她表示日前巡視擁有的物業，計劃放租。
貝安琪恨嫁
而Ankie表示周六便要飛往德國為電影《願望樹》處理後期工作，中秋節將與母親及親戚在德國度過。談到感情生活，她表示仍是單身：「都有幾個追求者。（圈外定圈內？）圈外，本地同外國人都有。（擇偶條件？）要溝通到，同尊重我嘅工作。」至於年底好友Rosemary的婚禮，她表示會當伴娘，問屆時會否叫Rose讓她接花球？她笑說：「冇用，我已經接過六次。（恨嫁？）都想(o架)，我好鍾意小朋友。」
與母親結伴出席的Helena，表示很喜歡與母親外出。談到感情生活，她指男友工作繁忙：「佢每朝四點起身，直到十點先收工。（冇時間陪你？）我哋會食晏，周末會出去。（拍拖帶埋媽咪？）梗係唔會，係一家人食飯先會。」文：名人組