祖兒為克勤抹汗 回饋粉絲有味巾

容祖兒於紅館演唱會後台化妝間放置一部按腳機，邊化妝整頭邊按腳，她謂：「每次演唱會阿媽都會搬嚟畀我用。」而容媽更照顧周到，每晚都不同湯水讓祖兒Keep fit兼補身，這晚祖兒便飲「鮑魚湯」，容媽更將鮑魚切片給祖兒當小食，又有歌迷自製曲奇很窩心，化妝間內放滿12對價值十多萬的Giuseppe Zanotti Design高踭鞋給祖兒隨時替換。在開騷前狄波拉（拉姑）和丈夫到後台與祖兒打招呼，拉姑見到祖兒即興奮抱抱，拉姑拿着掛在包包上的熊公仔說：「我帶咗謝霆鋒嚟睇你呀！」

玩道具險失手

至於前晚楊千嬅和鄺美雲來捧兩人場，祖兒在台上感激千嬅讓才：「千嬅佢好好，佢要走埠（巡唱），本身要攞走何炳（音樂總監），但佢都將何炳畀咗我哋。」期間祖兒向台下歌迷攞紙巾為克勤抹汗，歌迷要求要回「有汗紙巾」，祖兒照做，搞到克勤大喊：「你真係畀咗佢？好唔衞生喎，使唔使簽埋名呀？」

容祖兒應粉絲要求送出有克勤味道的紙巾。	容祖兒在後台享用按腳機，再歎容媽的鮑魚加靚湯補身。	祖兒的化妝間內放滿12對價值十多萬的Giuseppe Zanotti Design高踭鞋。

經過三小時演出，祖兒和克勤未見倦意，完騷後返後台逐一與好友合照，之後經過排舞室時，兩人拿起舞蹈員的巨型道具來影相，祖兒未料道具太重險些把它跌下。兩人受訪被問完成三晚演出是否更入佳境？祖兒稱頭兩場仍很緊張，克勤笑言：「邊會！你第一次做演唱會咩！做咗幾十次仲講呢啲！」祖兒解釋：「搭檔演出真係冇乜經驗，係今晚同克勤嗰Part跳啱晒。」問克勤舞功是否大進步？他笑謂：「呢啲都係相輔相成啦！」祖兒謂：「係呀，好似我講嘢都叻咗！」

拉姑與鬍鬚Kong撐場，笑言熊公仔是謝霆鋒。	祖兒與克勤忙裏偷閒在排舞室玩道具。	楊千嬅在台下捧場，獲祖兒答謝讓才。

住酒店熄冷氣

至於兩人身體狀態，他們齊聲兼踏地板說：「啋！」克勤謂：「由於時間關係，我哋開騷前已經病咗先，所以做騷就冇病嘞！」祖兒稱已搬到酒店暫住：「我會熄晒冷氣瞓，唔畀自己有機會凍親。（唔怕焗到病？）我情願熱都唔好凍親，我瞓覺會踢被(o架)！（媽媽陪住酒店？）我一個人歎晒。」有男友照顧？祖兒即搞笑向後彈開避答。

文：音樂組